Manipur tualchhung buaina vanga state chhunga raltlan, Internally Displace Persons (IDPs) tana Akampat relief camp siama chengten Ningania lungawi lohna lantir an tum chu securtity force-te chuan lo dangin, an inkarah buaina a chhuak.

Imphal East district-ah buaina hi chhuakin, IDPs 100 bawr velte chuan thuziak kengin chhawmdawlna ṭha zawk an mamawh thu leh an chenna hmuna an haw leh theih nan tualchhung buaina chu tihtawp a ngaih thute an tarlang a ni. Mipuiten an chenna hmun chhuahsana hungchhung pawn lam kal an tum chu police-te chuan lo dangin, anmahni hnawhdarh nan mittui-tlakna-hlo leh smoke bomb an hmang a ni.

Mipui lungawi lote leh police-te chu an innawr buai chhunzawm a, a hnuah police-te chuan mipuite nawrna avangin chhawmdawlna-in pawn lamah lungawi lohna lantir an phalsak ta a ni. Lungawi lohna hi Committee on Protection of Meitei Victims (COPMeV) kaihhruaina hnuaia neih niin raltlan zinga a tam zawkte hi Moreh, Tengnoupal district-a chengte an ni.

Lungawi loh lantirna hmuna awm, journalist pakhat chuan police kut a tuar a, SI pakhatin kut a thlak lai video chu social media lamah a darh a ni. All Manipur Working Journalists Union (AMWJU) leh Editors’ Guild Manipur (EGM) chuan an thawhpui kutthlak a ni chu pawi an tih thu tarlangin, SI chet dan chu an dem takzet a, dan anga hrem ngei an phut thu an sawi nghal. Mipui pungkhawm hnawh darh nana mittui-tlakna-hlo an hmanna bulhnaia awm, sikul naupang zingah nikhaw hre loa tlu an awm nia tarlan a ni bawk.

Buaina chingfel turin inbiakna neih mek a ni : CM

Manipur chief minister N Biren Singh chuan Ningani khan Manipur assembly-ah state sorkarin remna a awm theih nan inbiakna a kalpui mek tih sawiin, Silchar-ah inbiakna ṭum eng emaw zat neih a ni tawh tih a sawi.

Biren Singh chuan MLA leh mi pawimawh dangte nen remna zawngin Silchar-ah inbiakna an neih ṭhin thu sawiin, hun rei loteah chanchin ṭha lam puan tur an nei dawn a ni, a ti a, inbiaknaah hian tute nge tel tih a sawilang lo thung. Singh chuan Manipur buaina chu 'beisei loh leh an duh loh thil a ni' tiin a sawi bawk.

Manipur CM hian Congress MLA Surajkumar Okram zawhna chhangin, tualchhung buaina vanga nunna chan mi 226 an awm tawh tih a sawi a, a huhoa chetna a tam vangin thil sual titute man chhuah an har thu a sawi bawk a ni.