Inter-Ministerial Central Team (IMCT) chuan Tripura-a August 19-23 chhunga tuilian nasa tak thlengin chhiatna a thlente chu a hmuna endik hna an thawk ṭan.

IMCT hi member paruk niin, Ministry of Home Affairs-a joint secretary BC Joshi-a'n a ho a ni. Team pahnihah inṭhenin, nimin aṭang khan tuilian thlenna, South Tripura-a Belonia bakah Sonamura, Udaipur, Dumboor leh Khowai te tlawhin, tualchhung mite leh official-te an kawm bawk.

Official-a tarlan a nih danin, Tripura-a kar khat chhung tuilian vang hian mi 32 in nunna an chan a, thil tam tak ti chhe bawkin, tuilianin thil a tih chhiat hlut zawng hi Rs vbc 15,000 vel nia chhut a ni.

State sorkarin tuilian tuarte awm lailawkna tura a siam, relief camp-ah hian 400 vel la awmin, heng hmunah hian mi 70,000 vel an khawsa mek.

Tripura sorkar chuan an state-a chhiatna thleng hi 'Natural Calamity Affected Area'-ah a puang a, sorkar laipui chuan chhawmdawlna turin Rs vbc 40 a lo pe hmasa tawh bawk. State dangte pawhin Tripura ṭanpuina hi pein, an zingah hian Uttar Pradesh, Mahdya Pradesh leh Arunachal Pradesh pawh an tel. Tripura sorkar chuan Chhiatna dante hi a hmun ngeia endik turin sorkar laipuia ngenna a thlen hnuah central team hian Nilaini khan Tripura hi an thleng a, department hrang hranga official-te chu an state dinhmun thlirin review meeting an neihpui nghal bawk.

AIKS-in mitthi chhungte tan Rs vbc 1 phut

All India Kisan Sabha (AIKS) chuan Tripura-a tuilian vanga thi chhungte hnenah Rs vaibelchhe 1 ṭheuh pek an phut. Tuilenna hmunte hi tlawh an tum thu an sawi bawk.

Thuchhuah an siamah, AIKS chuan tuilian vanga nunna chan chhungte an tawrhpui thu an sawi a, mi eng emaw zatin nunna an chan bakah thlai chinna hmunte chhiain, ranvulh tam tak an thi bawk a ni, an ti. State leh central-a sorkarna chelh mektu, BJP sorkar chuan chhiatna thleng chungchangah warning a pe ṭha tawk lo a, hei bakah harsatna tawkte hmun him lama sawn chhuah kawngah pawh a thawk chak tawk lo tih an sawi.

Tulian tuarte chhawmdawl hna thawh pawh a muang hle a ni tiin, chaw, tui leh damdawi thlengin an tlachham ṭan tawh tih an tarlang.

Pradyot-an mitthi chhungte Rs 50,000 pe dawn

Tripura lal thlah leh Tipra Motha chairman hlui, Pradyot Kishore Manikya Debbarma chuan an state-a tuilian leh leimin vanga nunna chan chhungte hnenah Rs 50,000 ṭheuh a pe dawn tih a puang.

Pradyot chuan chhawmdawlna sum a pek tur hi a mimal sum aṭangin a ni dawn tih a sawi. State sorkar leh Tripura Tribal Areas Autonomous District Council (TTAADC) chu tun hnaia an state-a chhiatna thleng vanga chenna in leh ran vulh chante leh, thlai chinna ram chhiate chu zangnadawmna pe turin a ngensak bawk. Pradyot hian a hmain chhiatna thleng tuartute chhawmdawlna atan Rs nuai 10 a lo thawh tawh bawk a ni.