Manipur-a Jawaharlal Nehru Institute of Medical Sciences (JNIMS), Imphal- resident doctor-te chuan prograduate course fee tih san a nih vanga lungawi lohna lantirin, nimin zing dar 9 aṭang khan emergency service an boycott.
Resident doctor-te hian May 21 aṭang khan an routine service an lo boycott ṭan tawh a, nimin aṭang khan emergency leh non-emergency service an boycott leh ṭan ta a ni.
Resident Doctors Association (RDA) chuan post graduate course fee, kum khat atana Rs nuai 1 ni ṭhin, October 2022 batch aṭanga Rs nuai 3-a tih san a ni chu duh loin, fee pangngai ang hi kalpui leh turin an phut a ni. An thil phut tih hlawhtling turin thuneitute chu ni nga hun an pe a, an hun pek chhunga tih hlawhltinsak an nih tak loh avangin emergency service boycott hi an rel ta a ni. Fee tih san a ni chu thil dik lo a nih thu leh medical zirlaite tan phurrit a nih thu an sawi.
RDA chuan thuchhuah siamin, postgraduate resident doctor-te nen general body meeting neiin, an thil phut chungchang pawh hi an sawi ho tih an tarlang. Vawi tam tak thuneitute hnen an thlen hnuah pawh chhanna an hmuh loh avangin lungawi lohna hi an lantir thu an sawi. Lungawi lohna an lantir mek lai hian tualchhunga buaina thleng chu pawi an tih thu an sawi a, damlo na zualte chu enkawlna an pek zawm tur thu tarlang bawk. RDA chuan an ngenna leh an thil phutte a rang thei ang bera tih hlawhtlinsak tura thuneitute ngenin, hmalakna a awm lo a nih chu nawrh chhunzawm zel an tum thu an tarlang.
