Kumin March thlaa Myanmar-a man, United States journalist Nathan Maung chu Thawhṭanni khan Insein tan-in aṭanga chhuah tir a ni a, a laka thubuai thehluh pawh hnuhkir vek niin, nimin khan US panin a thlawk haw nghal tih a lawyer chuan a sawi.
Kamayat Media dintu, Nathang Maung hian sipai rorelna kalh zawnga che ṭhin leh colonial-era law bawhchhiaa puhin thubuai siamsak a ni. Thla tir khan he dan hnuaiah hian Myanmar journalist pakhat chu kum hnih chhung lungin tang tura hrem a lo ni tawh a ni.
February 1-a civil sorkar leh a hruaitu Aung San Suu Kyi paihthlak a nih aṭang khan Myanmar ramchhungah mipui lungawi lo te hi khawpui kawtthlerah an la pungkhawm chhunzawm reng a ni. Sipaite chuan lungawi lohna lantirte hi silaia kapin, zanlaiah an rinhlelh zawngte luhchilhin an man a, journalist pawh bitum niin news channel-te pawh an kharsak bawk.
Tualchhung buaina a chhuah hnuah ramdang journalist eng emaw zat man tel an ni a, an zingah hian May 24-a US pan a tum laia an man, Danny Fenster pawh a tel. Fenster chanchin, a awmna leh a hriselna dinhmun hi thuneitute lam chuan tun thleng an la puangzar lo.
Sipai rorelna duh lohna lantir a nih aṭangin nawrh huaihawt zinga mi 860 chu thah a ni tawh tih monitoring group chuan a tarlang.
Covid-19 vaccination programme hotu hlui man
Myanmar rama COVID-19 immunisation programme hotu hlui, Dr Htar Htar Lin chu mahni ram phatsan a, sipai thuneitute hmelma thawhpuia puhin man a ni tih state media chuan Thawhṭanni khan a sawi.
Aung San Suu Kyi-i kaihhruai civil sorkarin an rama Covid-19 hri leng do hna hlawhtling taka a kalpui laiin, February 1-a sipaiten civil sorkar thuneihna an hnehchhuh aṭang khan Myanmar healthcare system leh hri leng laka invenna kalpuina chu a tlachhe sawt hle nia sawi a ni. Pathianni khan sipai rorelna hnuaia an awm leh hnuah hri kai thar an tam ber ṭum niin mi 373 in hri an kai thar a ni.
Sipai sorkar dodalna, Civil Disobedience Movement (CDM) kalpuinaah doctor leh medical worker tam tak chu a hmatawngah an tel a, an zinga tam tak chu man niin, man tuma zawn mek pawh an awm.
Sipaiten Parliament an ṭhiah taka member hluite chuan civil sorkar aiawhtu National Unity Government (NUG) an din thar leh a, Covid-19 vaccination programme hotu hlui Dr Lin pawh NUG thawhpuiah puh a ni a, June 10 khan man a ni.
Global New Light of Myanmar chuan Dr Lin hian CDM hi a zawm a, doctor leh staff dangte nen CDM Crore Group an din tih pawh a inpuang tawh niin a tarlang. Sipai sorkar hian NUG hi firfiak pawlah a puang tawh a ni.
Dr Lin leh a thurualpui nia sawi doctor dang 11-te chu ram phatsan, , diklo taka mipui fuihpawrh leh dan loa pawl dang thawhpuia puhna thubuai siamsak an ni dawn.
