Iraq prime minister Mustafa al-Kadhimi chuan an ram khawpui, Baghdad-a a chenna ina thah tuma beihna chu vanneihthlak takin a pumpelh niin Iraq sipai thuchhuah chuan a tarlang.

Nimin zing khan puakthei thil phurtu, drone hmangin PM chenna hi beih a ni a,PM personal protection force zinga paruk an hliam a, PM Al-Kadhimi erawh a him a ni. He thil thlen hnu hian PM chuan a twitter-ah a ṭhat thu sawiin, mipuite chu inbengdai turin a ngen nghal bawk.

Iraq-ah hian October 10-a inthlanpui an neih result-a lungawi loin pawl ṭhenkhatten nawrh an huaihawt a, nawrh huaihawtnaah hian buaina pawh a chhuak a ni. Vote thlak leh vote chhiar danah thil fel tawk lo a awm niin an sawi. Zirtawpni khan nawrh huaihawtnaa hnawhdarh nan hian police-te chuan tear gas an hman bakah silai pawh an kap a, pungkhawm zingah pakhat a thi a ni. He thil thlengah hian eptu lam chuan PM hi mawhphurtuah an puh a ni.

Pathiannia PM chenna in beitu hi eng pawl mahin an tih a nih thu an la sawi lo a, security force-te chuan pawikhawihtute zawnchhuah tumin theihtawp an chhuah thu an sawi. PM chenna in hi drone pathuma kah a nih thu sawiin, hengte hi Tigris luia Republic Bridge bul aṭanga kah chhuah an ni a, pahnih chu an lo kapthla niin security force-te chuan an sawi. Drone hian PM chenna ina hmun ṭhenkhat leh garage-a SUV motor ding lai chu a tichhia a ni.