Thai police officer hlui pakhat chuan Ningani khan silai leh chem nen Thailand hmarchhak lam, Nong Bua Lamphu province-a Uthai Sawan khuaa childcare centre beiin mi 36 a that. A mi thah zinga 23-te chu nursery naupang an ni a, a ṭhen chu kum hnih mi lekte an ni. Thailand ram chanchina inthahna thleng rapthlak ber zinga mi a ni.
Pawikhawihtu, Panya Khamrab hian daycare centre a beih hnuah a chenna in lamah letin, a nupui leh fa a that leh a, a hnuah amah a intihlum zui niin police-te chuan an sawi.
Nimin khan Thailand ram pumah thi te sunna atan an ram flag chu a ngul chanveah zar a ni. Nimin zing vek khan pawikhawihna thlenna, Young Children’s Development Centre-ah sorkar leh lalchhungkaw aiawhte chuan thi te sunna atan pangpar an dah bawk.
Pawikhawihtu hi kum 34 mi, Panya Khamrab niin police sergeant hlui a ni a, a pawikhawihna chhan hi hriat chian a la ni lo. Childcare centre a beihnaah hian 9mm pistol leh chem a keng a, mahse naupangte thah nan hian a chem zawk hi a hmang niin police-te chuan an sawi. Khamrab hi damdawi a khawih avangin January thla khan a hna aṭangin suspend a ni a, June thlaah khan ban a ni zui tih National Police Chief Damrongsak Kittiprapat chuan a sawi.
Khamrab hian pawikhawihna a thlen hma, Ningani zing khan methamphetamine hmang leh zuar-a puh a nih chungchangah court hearing a nei a, nimin khan a thubuai hi ngaihtuah chhunzawm tura tih a ni.
Pawikhawihna thlenna, nursery acting chief Nanthicha Punchum chuan staff ṭhenkhatin nursery pawn lama chaw chhun an ei laiin, Khamrab hian a car-a rawn kalin, zirtirtu zinga pali chu a rawn kaphlum niin a sawi. Hemi hnu hian kawngkhar chu tichhiain, inchhunga naupang awmte chu a chem nen a bei zui ta a ni, a ti.
Thailand prime minister Prayut Chan-O-Cha chuan hetiang thil rapthlak tak hi a thleng tur a ni lo tiin, hliam tuarte leh an hmangaih chante chu a tawrhpui takzet tih a sawi. National police hotu hnenah hian pawikhawihna thlen dan chu rang taka chhui turin a ti. Nimin khan PM hian pawikhawihna thlenna hmun hi a tlawh nghal bawk.
