Pakistan defence minister Khawaja Asif chuan an ram Prime Minister hlui, Imran Khan chu sipai court-ah a chungthu ngaihtuah a nih ngei a rinawm thu a sawi.

May 9-a Imran Khan-a party, Pakistan Tehreek-e-Insaf (PTI) worker-te'n ram chhung hmun hrang hranga buaina an siam ṭuma, sipai leh sorkar hmun pawimawhte an beih tel chungchangah, Imran Khan hi inhnamhnawiha puh a ni.

Kum 70 mi, Khan hi a party worker-te'n buaina siam a, tharum thawhna nasa tak an thlen chungchangah a inrawlh ve ngei tih finfiah a nih chuan, military court-ah a chungthu hi ngaihtuah a ni dawn tih Asif chuan a sawi. Hemi rual hian May 9-a pawikhawihna thleng kaihhnawihah PTI hotu hi thubuai engmah siamsak a la ni lo tih a sawi. Hemi hma hian interior minister, Rana Sanaullah chuan Khan hi May 9-a party worker-te buaina siamah, a ruahmantu ber a nih avangin sipai court a thlen a ngai dawn tih a lo sawi tawh bawk.

Sipai hmun suasamtu leh he thila inhnamhnawihte hi Army Act leh Official Secrets Act hnuaiah thubuai siamsak theih an ni dawn a, heng mite chungah hian zahngaihna lantir a ni dawn lo tih Army Chief General Asim Munir chuan a lo sawi lang tawh. PTI worker-te hian sipai leh sorkar building pawimawh 20 chuang an khawih a, heng zingah hian Lahore Corps Commander House, Mianwali air base leh Failasabad-a ISI building bakah, Rawalpindi-a Army headquarters (GHQ) pawh a tel a ni.

Hetih lai hian Imran Khan chuan pawikhawihna thlen lai hian jail-ah a awm a, inhnamhnawihna engmah a neih loh thu a sawi. He thil hi thuneitute lamin sorkar laka hel zawnga che a puh a, kum 10 chhung jail-a tantir an tumna kawnga an ruahmanna a ni, a ti.

Law enforcement agency-te chuan May 9-a buaina chhuak kaihhnawihah hian PTI worker 10,000 chuang an man tawh a, an zinga 4,000 chu Punjab province-a mi an ni. Police-te chuan buaina chhuakah hian mi 10 an thi niin an sawi a, mahse Khan-a party lam chuan security force-te silai hmeh puahah an party mi leh sa 40 in nunna an chan tih an sawi thung.