Niger President leh a kaihhruai sorkar paihthla a, thuneihna changtu sipaite chuan nimin khan an ram airspace chu thupek dang a awm leh hma atan an khar. An ṭhenawm ramte aṭanga an ram bei tura sipaite an rawn chetchhuah mai venthawn thilah he thutlukna hi siam an nih thu an sawi.
West Africa ram intelkhawm. Ecowas chuan Niger sipaite hi vauin, a thuneihna aṭanga an paihthlak tak, president Mohamed Bazoum chu a dinhmun ngaiah an dah let loh a nih chuan sipai chakna an hmang ve dawn tih an sawi. Pathianni zanlai thleng kha hun an pe a ni.
Mahse Niger sipaite chuan Ecowas thupek hi zawm loin, an hun pek a ral tak avangin an ram an inkharkhip zui a, sipaite chu an ram venghim turin an inpeih tih an sawi zui bawk.
President Bazoum hi July 26 khan sipaite chuan an hreng a, hemi hnu hian presidential guard commander, gen Abdourahmane Tchiani chu an ram hruaitu tharah a inpuang zui a ni.
Civil sorkar paihthla a, sipaiten thuneihna an chelh hi ram hrang hrangten an sawisel a, sawiseltu zingah hian Niger ram lo awp tawhtu, France ram bakah European Union, UN leh US te pawh an tel. France ram aṭanga an independent hnuah pawh Niger ramah hian France sipai 1,500 vel an la awm.
Hetih lai hian sipaite chuan ram dangte chu an ram bei turin an inbuatsaih mek nia sawiin, mipuite chu an ram venghim tura inpeih turin an chah. Pathianni khan Niger mipui sing tel chu an ram khawpui, Niamey-a stadium-ah pungkhawmin, sipai sorkar an thlawpna an lantir. France an duh lohna thute an aupui a, stadium-ah hian Russia flag an zar bawk.
