US official-te chuan Inrinni khan US sipai bungraw phur thlawhtheihna, C-130 hmangin, Gaza-ah eitur an thlak thu an puang. Gaza-a eitur thawn luh nan hian thlawhtheihna pathum hman niin, heng thlawhtheihna aṭang hian bawm 66 thlak a ni a, bawmah hian chaw atana rin theih ei tur 38,000 a awm.
Thlawhtheihna hmanga Gaza-a eitur thlak a nih tur thu hi US president Joe Biden chuan March 1 khan a lo sawi tawh a, Inrinni liam taa eitur an thawn luh hi a hmasa ber nia ngaih a ni. Gaza-a thlawhtheihna hmanga eitur thlak hi Jordan ram kaihhruaina hnuaiah neih a ni a, Jordan hian vawi eng emaw zat Gaza-ah hian eitur a lo thlak tawh a, France pawhin an lo thlak tawh bawk.
February 29 khan Gaza-ah hian eitur thawn luhte an inchuh avangin Palestinian mi 115 zet an lo thi tawh niin Hamas kaihhruai sorkar hnuaia health ministry chuan an tarlang a, mi 100 chuangin hliam an tuar bawk a ni. Israel leh Hamas indona avang hian Palestine-ah chuan ṭam a tla mai tawh dawn niin an sawi a, Israel-in Gaza mamawh lak luhna kawngpui a dan chhunzawm zel avangin eitur tlakchhamna awm chho ṭanin, a bikin hmar lama chengte chuan ṭanpuina an mamawh zual a ni.
US-in eitur a thawn luh hi mihringin dam khawchhuah nana a mamawh, rikrum thila thawn luh chauh a nih thu leh, eitur inchuh vanga thihna a thlen tawh loh nana a him thei ang ber tura an hriat, thlawhtheihna hmangin an thlak ta niin US sorkar thupuangtu, John Kirby chuan a sawi.
US chuan kar ruk chhung Gaza-a inkahhai puan a nih theihna tura inremna siamna tur chu buaipui mek a nih thu leh, Israel lam pawhin he inremna hi an pawm theih thu a sawi. Hamas lamin an mi hren mek zinga ngaihtuahawm zual - dam lo, hliam, kum upa leh hmeichhiate chhuah an remtih chuan, Gaza-ah hian kar ruk chhung inkahhai puan theih a ni dawn a ni, an ti. Nimin khan inremna a awm theihna atana palai hna tawktute chu Cairo-ah an inhmukhawm leh a, he hunah hian Hamas leh Israel aiawhte pawh tel tura beisei an nih thu an tarlang.
