US President Joe Biden leh an ram tlawha zin, Israel Prime Minister Benjamin Netanyahu te chu July 25 khan White House-ah inkawmin, indona thlen mekna Gaza Strip-a inkahhai puan chungchang an sawi dun.
Israel PM hian kum 2020 hnua White House a tlawh leh ṭum khatna niin, Gaza indona titawp tura nawrna an dawn tam lai leh US ngei pawhin inkahhai puang tura inremna nei tura an nawr lai a ni. Netanyahu hian Nilaini khan US Congress-ah thu sawiin, Gaza indonaah hnehna pumhlum chang turin an bei zel dawn tih sawi mah se US President Biden chuan inkahhai puang tura inremna ziak turin Israel PM hi a duh a ni.
President Biden chuan Hamas leh Israel chuan thla 9 chhung indona an kalpui tawh chu tawpsanin inremna nei thei se a duh tih an inkawmnaah hian a sawi a ni.
White House national security thupuangtu, John Kirby chuan inkahhai thuthlung chuan mi tang chhuah zalen tura inremna pawh a keng tel a ni, a ti. Israel leh Hamas hian inremna an nei thei ṭep tih sawiin, hemi hma hian thil chin fel tur erawh a la awm tih White House official-te chuan an sawi bawk.
US vice president Kamala Harris leh Netanyahu chuan Ningani khan a hrana inkawmna hun nei bawkin, Gaza-a mipui dikna chanvo rahbeh mek a nih chungchang an sawi dun a ni. Israel chuan a ram venghim turin dikna a nei tih a pawmpui thu Harris chuan a sawi a, hemi rual hian indona avanga Gaza-a mipuite tawrhna chungchang a sawi lang bawk. Gaza mipuite tawrhna chu au chhuahpui zel a tum tih Harris chuan a sawi bawk a ni.
