US defence secretary Llyod Austin chuan Lebanon helpawl, Hezbollah-in Israel a bei a nih chuan Israel an pui dawn tih a sawi. He thu hi Israel beihpui thlaknaa Iran thlawp, Hezbollah helpawl commander pahnih an thih avanga helpawlin phuba lak an tiam thu an sawi hnuah a sawi a ni.
Lloyd Austin chuan, "Israel hi beih a nih chuan, venghim turin kan pui ngei dawn a ni. Hetianga kan chetna hi April thla khan in hmuh tawh kha, khatiang khan kan ti leh ngei ang," a ti. Kumin April thla laihawla Iran, Iraq, Syria leh Yemen aṭanga Iran drone leh missile hmanga Israel ram kah a nih ṭum khan, US bakah UK leh France-te chuan Israel hi lo puiin, heng ralthuamte hi an lo kahthlak pui a ni. US president Joe Biden pawhin, "Israel-in an ram beitu drone leh missile a kahthlaknaah kan pui a ni," tiin a sawi.
US chuan Middle East-ah buaina lian zawk a chhuah a duh lo a, hemi atan hian inbiakna hmanga buaina chinfel dan kawng zawngin theihtawp a chhuah a ni tiin Austin chuan a sawi bawk. Mahse Thawhlehnia Lebanon khawpui, Beirut-a Hezbollah commander Fuad Shukr thah a nih avang leh, a hnu lawkah Tehran-a Hamas political leader Ismail Haniyeh thah leh a nih avangin inbeihna nasa zawk a thlen chhoh hlauhthawnna a lian hle.
Israel Defence Forces (IDF) thupuangtu, rear admiral Daniel Hagari chuan Fuad Shukr chu Iran thlawp helpawl hotupa, Hassan Nasrallah thachhang dawltu ber a ni tiin, Israel mi 12 thihna Golan Height beihna a mawhphurtu a nih thu a sawi. Hezbollah lam chuan Golan Height beihnaah hian inhnamhnawihna an nei lo niin an sawi thung. Mahse US National Security Council thupuangtu, Adrienne Watson chuan Hezbollah-te tih ngei a ni tih sawiin, "An rocket ngei a ni a, an thununna bial chhung aṭanga kah chhuah a ni bawk," a ti.
Israel prime minister Benjamin Netanyahu chuan Ningani khan Israel chu eng ang beihna pawh tawk turin a inralring reng a, an ram beitute chu a chhan letna na tak an pe zel dawn tih a sawi. Home Front Commando a tlawhnaah he thu hi sawiin, "Min tina tu chu kan tina ve ang," a ti. US-in Hezbollah leh Iran-in Israel a bei a nih chuan Israel an pui dawn tih a sawi hnuah, US president Joe Biden nen pawh an inbe tawh bawk.
