United Center, Chicago, Illinois-a Democratic National Convention neih chu August 22, Ningani khan a ṭiak a, hemi ṭum hian party presidential candidate tura rawtna chu Kamala Harris chuan a pawm.
Kum 59 mi, Kamala Harris-in party candidate a pawmna thu sawiah, kumin inthlan lo awm tur hmangin an ram chuan hun ṭha zawk siam theihna hun an nei dawn tih a sawi. Mipuite chu party pakhat emaw pawl pakhat ang ni loa American an nihna anga ṭangrual turin a sawm.
Democrats presidential candidate ni tura a inbeisei loh thu sawiin, tun dinhmun a thlen theih nan a beisei loh thil tam tak a thleng tih a sawi. Mahse a zam phah lo a, a beisei loh thil hmachhawn kawngah a mikhual lo a ni, a ti.
US vice president ni lai, Harris hian a naupanlai, hun harsa a tawh laite sawichhuakin tihduhdahna tuartu ṭhian a neih vanga prosecutor ni tura a rilru a siamfel thute a sawilang. A khingpui, Republican presidential candidate Donald Trump chu a bei zui a, Trump chu kawng tam takah a thutak tawk lo tiin, White House-a a luh leh tawh loh nan an ṭan a ngai tih a sawi a ni.
Harris chuan Donald Trump president a nih leh chuan buaina tam tak an hmachhawn dawn tih a sawi a, president a nih lai khan inrelbawlna kawngah thil fel lo tam tak a awm thu sawiin kum 2020-a a chak loh vanga result tih danglam tumah a puh bawk. Trump chu democracy zah loah a puh a ni.
Gaza indona chungchang sawilang bawkin, Harris chuan Israel-in a ram humhim turin dikna a nei tih a pawm thu a sawi a, mahse Gaza Strip a tawrhna thleng mek chu a lungchhiatthlak hle a ni, a ti. Gaza indona a tawp theih nan President Joe Biden nen theihtawp an chhuah tih a sawi. President a nih chuan Ukraine leh NATO thlawp a tum thu a sawi bawk.
Kamala Harris hi Jamaica leh India aṭanga pem lutte thlah kal zel niin mihang hmeichhia leh South Asia thlah, US-a party lianin presidential candidate atana an puan hmasak ber a ni. Democrats presidential candidate atana thlan, Joe Biden chu party lamin an nawrna avangin July thla tawp lam khan president candidate a nihna aṭangin a inhnukdawk a, hemi hnu hian party delegate-te chuan Kamala Harris hi an party presidential candidate ni turin an thlawp zui ta a ni.
November 5 hian US President hi thlan a ni dawn a, Kamala Harris hi thlan tlin a nih chuan US-in hmeichhe president a neih hmasa ber a ni ang. Hmeichhe vice president ni thei hmasa ber a lo ni tawh bawk a ni.
