Israel prime minister Benjamin Netanyahu chuan Pathianni, November 10, 2024 khan kumin September thlaa an hmelma, Lebanon-a Hezbollah helpawlten inbiakpawhna atana an hman ber, pager beih a nih chungchang chu a remtihpui thu a sawi chhuak.
Hezbollah helpawl hian an pawl inbiakpawhna atana hman, pager an hman chu kumin September khan an ken lai leh ah laite a puak vak a, mi 40 dawnin an thih phah bakah 3,000 velin hliam an tawrh phah bawk. He thil thlengah hian Hezbollah lam chuan Israel an mawhpuh a ni. Mahse Israel hian he thil thlengah hian a inrawlh leh inrawlh loh chungchang engmah a sawi chhuak lo a, Prime Minister Netanyahu chuan a vawi khatna atan Israel a inrawlh thu hi a sawi chhuak ta a ni.
Pathiannia cabinet meeting-ah Netanyahu chuan a thupek an hmuh hnuah Israel sipaiten Beirut-a Hezbollah hotu, Hassan Nasrallah an that tih pawh a sawi bawk. "Pager beih leh Hassan Nasrallah dahṭhat chu defence lama official-ten an dodal chungin kalpui a ni," a ti.
Hezbollah te hian Israel lamin an chhui zui theih lohna turin technology changkang zawk hmang duh loin, inbiakpawhna atan GPS, microphone leh camera pawh awm lo pager hi an hmang ṭhin. Mahse September thla khan helpawlte pager leh walkie-talkie an hmante chu Lebanon ram chhungah minute 30 chhungin sang tel a puak a ni.
Thlanmual hnuaia Hezbollah tunnel siam hmu chhuak
Israel sipaite chuan Pathianni vek khan Lebanon rama Hezbollah helpawlin tunnel an siam eng emaw zat an tih chhiatsak thu an sawi. Hezbollah tunnel an hmuh chhuah zingah hian thlanmual hnuaia an siamte pawh a tel.
Israel Defence Force (IDF) chuan thlanmual hnuaia Hezbollah helpawl tunnel siam hi km 1 vela thui niin, command leh control room bakah mutna leh ralthuam dahna hmunte a awm tih an sawi. He tunnel-a ralthuam thuhruk eng emaw zat chu video-in an ti lang bawk.
Thla hmasa khan Hezbollah member-ten Lebanon chhim lama civil mite chenna in hnuaia tunnel an siam chu IDF hian an lo hmu chhuak tawh a, he tunnel hi Gaza-a Hamas hoin an siam dan nen an in ang lo hle tih an sawi. Hezbollah te tunnel an hmuh chhuah hi chu a kawngka pawh thir vek niin, a chhungah bedroom, bathroom, AK-47 rifle roomte a awm bakah, tui dahkhawlna leh two-wheeler te pawh a awm. Heng hmunah hian helho chu kar eng emaw zat nuamsa takin an awm thei dawn niin Israel sipaite chuan an sawi a ni.
