Israel prime minister Benjamin Netanyahu chenna in, Caearea ami chu Inrinni liam ta khan flash bomb hmangin beih a ni a, heng bomb pahnih hi a compound chhunga a huanah an tla a, thil tih chhiat erawh an nei lo.
Israel police leh Shin Bet chuan thuchhuah inṭawm siamin, PM Netanyahu chenna in bitum a nih thu hi an sawi a, mahse he thil thlen lai hian PM leh a chhungte hi an awm lo a ni. He thil thleng kaihhnawihah hian police-te chuan mi pathum an man tawh.
Defence minister Israel Katz chuan he thil thleng hi a dem thu sawiin, Prime Minister chu an hmelma, Iran leh Hezbollah lakah Israel ram chhung aṭang ngei pawhin a dinhmun a derthawng niin a sawi. October thla khan PM chenna hi drone hmanga beih a lo ni tawh bawk a, Iran thlawp Hezbollah ten an tih niin an sawi. Netanyahu chuan Hezbollah chu amah leh a nupui thah tumah puhin, Iran thlawp helpawlte beihna chu chhunzawm zel a, hnehna an chan ngei tur thu pawh a sawi bawk.
President Isaac Herzog pawhin PM Netanyahu chenna in beih a ni chu a dem thu sawiin, hei hi thil hlauhthawnawm leh ngaihzam mai chi a ni lo a ti. Shin Bet chief Ronen Bar pawh a biak nghal thu a sawi a, security agency-ten an chhui chian mek thu a tarlang. Inrinnia Israel PM chenna beih a ni hi Israel-a political party hrang hrang hruaitute pawhin an dem thu an sawi.
Tun hnaiah Israel leh Hezbollah te hi an inbei nasa chho hle a, PM chenna beih a nih ṭum pawh hian Haifa-a synagogue chu Hezbollah ten rocket-in an kap a, mi pahnih an hliam. Israel chuan Lebanon aṭanga projectile kah chhuah eng emaw zat an kap thla tih an sawi.
Israel-in Iran-a top secret nuke lab kap chhia
Israel sipaiten October thla tawp lam khan Iran-a Parchin military complex an bei a, he hmun hi nuclear weapon laboratory lab awmna hmun a ni.
Iran khawpui, Tehran khaw daia Iran top secret nuclear lab an kah chhiat sak vangin Iran tan nuclear ralthuam siamna tura zirchianna a neih mek chu chhunzawm rih a har dawn nia rin a ni. Nikum aṭang khan Iran hian nuclear ralthuam siamna turin a rukin research a kalpui niin an sawi. Mahse Israel sipaite hian a design-na tura pawimawh tak, Taleghan 2 facility chu an kah chhiat sak nia sawi a ni.
Iran foreign minister Abbas Araghchi chuan nuclear ralthuam siam tum nia an puh chu a pha nasa hle thung a, "Iran hian nuclear ralthuam siam a tum lo," a ti. Mahse Israel leh US official-te erawh chuan an pawmpui lo thung. Hemi hma lawk hian White House chuan Israel leh US intelligence-ten Iran-in research a neih danah thil rinhlelhawm tak an hmuh thu Iran pawh hi a lo hrilh tawh bawk.
Taleghan 2 facility hi Iran Amad nuclear weapons program peng pakhat a ni ṭhin a, kum 2003 aṭang chawlhsan a ni. Mahse, tun hnaiah hian Iran hian nuclear ralthuam siam tum hian research neiin hma a la leh ṭan nia sawi a ni. Israel sipaiten an kah chhiat sak avang hian Israel leh Iran buaina pawh a punlun zual leh rin a ni bawk.
October 26 khan Israel sipaite hian darkar eng emaw zat chhung beihpui thlakin, Iran military site hrang hrang a bitum. Heng zingah hian drone leh ballistic missile siamna leh kah chhuahna hmun te, air defence battery-te pawh an tel.
