US president Joe Biden kaihhruai sorkar chuan Ukraine chu Russia ram chhung a beihnaah US ralthuam hman a phalsak.
He thutlukna hi Pathianni khan siam a ni tih official pahnih chuan an sawi a, hei hi a hmaa US-in Ukraine-Russia indonaa thleng meka a policy lo neih tawh nen a inpersan thung a ni. US-in a phalsak tak avangin, Ukraine hian ni rei loteah long-range missile hmangin Russia pawh a bei dawn nia sawi a ni nghal bawk.
Ukraine president Volodymyr Zelenskyy chuan US ralthuam an neihte chu Russia sipai hmunte beihna atana hman phalsak turin hun rei tak a lo dil tawh a ni. Hun rei tak a ngenna hian phalsak a nih loh hnuah, President elect Donald Trump-a'n office a luah hma thla hnih a la awmah US sorkar chuan a policy lo siam tawh chu a thlak danglam ta a ni. Hetianga thutlukna a thlak chhan hi Russia sipaite pui tura North Korea sipai ṭhahnem tak tirh an ni vang nia sawi a ni.
US thutlukna thlak danglam chungchangah hian Russia lam chuan sawi an la nei lo a, White House leh US State Department pawhin official-a thuchhuah an la nei lo bawk.
Russia upper house, Federation Council- international affairs committee first deputy head, Vladimir Dzhabarov chuan US-in Russia ram chhung beih a phalsakna hian khawvel indopui pathumna a chawk chhawk thuai dawn a ni, a ti. "Khawthlang ram thutlukna hian buaina nasa taka cho chhuakin, Ukraine ram chhiat vekna a thlen thei zawk dawn a ni," tiin Federation Council-a senior member Andre Klishas pawhin a sawi bawk a ni.
Russia-in Ukraine hmar lam a bei
Russia chuan Pathianni, November 17, 2024 khan Ukraine hmarlam Sumy khua chu drone leh missile hmangin a bei leh a, mi pariat an thi. Thi zingah hian naupang pahnih an tel niin Ukraine internal affairs minister Ihor Klymenko chuan a sawi. Hliam tuar mi 400 chuang an awm bawk.
Russia drone leh missile hian Ukraine energy leh infrastructure te chu a bitum ber. Thlasik a thleng dawn a, hei vang hian Ukraine tana buaina nasa tak thlen tumin power generation capacity lam hi beih a tum nia rin a ni a, hei hian hlauhthawnna pawh a ti zual hle. Pathianni vek khan Ukraine defence lam chuan Russia aṭanga an kahna, air target 210 zinga 140 chu an kah thlak thu an sawi.
Odesa bialah pawh energy infrastructure bomb a nih vangin mi pahnih an thi a, power leh water supply a chhiat thu governor leh Kipen chuan a sawi. Mitthi pahnihte hi Ukraine sorkar hnuaia power grid operator, Ukrenergo a hnathawk an nih thu company chuan a sawi bawk. Private company, DTEK enkawl thermal power plant pawh nasa taka kah chhiat a ni.
Pathiannia Russia-in drone leh missile hmanga an ram hmarlam a beih hi thla thum chhunga Ukraine a beihna lian tham ber a nih thu City Military Administration hotu, Serhii Popko chuan a sawi.
