South Korea president Yoon Suk Yeol chuan an ram huna Thawhlehni zan khan sorkar dodaltute leh North Korea do letna turin, sipai hnena thuneihna sang pek, martial law chu an ram pumah a puang. Mahse Parliament-in martial law puan hi a hnawl avangin, nimin khan sorkar chuan a sut leh nghal a ni.

President Yoon thuchhuah hian mipui leh roreltute pawh a ṭhawng hle a, martial law a puan aṭanga darkar thum hnuah Parliament, National Assembly chuan a ngaihtuah nghal a ni. National Assembly speaker Woo Woon Shik chuan martial law puan a nih dan chu dan kalh ani tiin, Parliament member leh mipuite chuan an ram democracy an venghim zel dawn tiin a sawi. Parliament hian martial law puan chungchangah vote la nghalin, a duh lo lam an tam zawk a, hemi hnu hian President pawhin martial law a puan chu a sut zui ve nghal bawk.

Eptu party-te chuan President thiltih dan hi na takin sawiin, President a nihna aṭanga paihthlak an phut a, impeachment motion an pu lut nghal a ni. Hei hi ngaihtuah a nih dawn leh dawn loh Parliament-ah member-te vote an la ang. Yoon-a party, People Power Party hruaitu, Han Dong-hoon pawh martial law thlawp lotu zingah hian a tel a ni.

South Korea rama danpui hnuaiah, President hian indo lai, indo lai boruak anga harsatna thleng a awm laiin, dan leh thupek kenkawh kawnga sipaite thuneihna sang pek an nih theihna turin martial law hi a puang thei a ni. Mahse tuna South Korea ram dinhmun thlirin, martial law puan ngai khawpah an awma ngaih a ni lo. Danpui hian National Assembly-in majority vote hmanga martial law hlih tura an phut chuan, President hian a zawm tur a ni, tih a tarlang bawk.

President Yoon-a'n martial law a puan veleh hian South Korea sipaite chu Parliament-ah duty tira dah nghal niin, sipaite hian Parliament rorel inkhawm leh, politics kaihhnawih thila punkhawmte khap a nih thu pawh an sawi nghal bawk. Mahse martial law hlih a nih zui leh tak avangin, sipaite pawh Parliament-a an duty-na aṭangin koh kir leh an ni tawh.

Eptuten President Yoon ban tura an phutna hi tihlawhtling tur chuan, Parliament member awm zat, mi 300 zinga hmun thuma ṭhena hmuh hnih, mi 200 talin an thlawp a ngai dawn a ni. A chungthu hi ngaihtuah remtih a nih chuan, Constitutional Court-in a rel fel hma chu a thuneihna hi hlih sak a ni ang a, prime minister Han Duck-soo chuan president mawhphurhna a kenkawh a ngai dawn a ni.