Nimin zing aṭang khan Jammu and Kashmir-a Pulwama District-ah hel leh sipaite an inkap a, hriat theih chianah hel pahnih kah hlum an ni tawh.
Police-te chuan helte hian security force-te hi Tral area-ah an lo kap tih sawiin; security force-te hian an kaplet ve nghal a ni. Inkahna hi nimin thleng kha chuan a la tawp lo a, sipaite hian hel dap chhuah beihpui an thlak nghal bawk.
An inkahna hmun hi ramngaw a ni a, Tral-a Nagbal Forest area a ni. He lai hmunah hian Jammu and Kashmir Police, Army Special Operations Group leh CRPF-te chuan hel dapchhuah beihpui an thlak a, hetah hian helte hian lo kapin inkahna hi a thleng ta a ni.
Inkahna a thlen hnu hian union home minister Amit Shah chuan Jammu and Kashmir hi a tlawh nghal tur thu a puang a ni.
Hel dap beihpui
J&K-a Pulwama-ah hian hel pawl eng emaw zat an inkulh tih hriat a ni a; tunkar Thawhṭanni zing aṭang khan security force, 55 Rashtriya Rifles-te chuan beihpui an thlak a, security force-te hi CRPF leh SOG-te chuan zawm ve bawkin, tun Pathianni pawh khan hel pawl mi leh sa pali an kap hlum a ni.
Hel kah hlumte hi - Showkat Ahmad, Azad Ahmad, Suhail Yousuf leh Hassan Mir-te an ni a, Showkat hi a khaipa berte zinga mi a ni. Hel pawl Hizbul Mujahideen mi leh sa a ni a, a hnuah AGH a zawm leh a ni.
2016-18 chhungin sipai 334 thi
Defence minister Rajnath Singh chuan Thawhṭanni khan Rajya Sabha-ah ziaka zawhna a chhannaah, kum 2016-18 chhung khan J&K-ah hian hel kutah sipai 334 an thi tih a sawi. Kum 2016 khan sipai 113-in nunna an chána, 2017-ah 125 leh 2018-ah sipai 96 an thi bawk. Hemi hun chhung vek hian sipai 31-in hliam an tuar tih a sawi bawk.
Rajnath Singh chuan hetih hun chhung vek hian India-Pakistan ramriah sipai 69 an thi tih House a hrilh bawk a, AFSPA chu J&K leh hmarchhak state hmun ṭhenkhatah kalpui reng a la ni, a ti. Sipaite thihna hi Armed Forces Special Powers Act (AFSPA) hmanna huamchhung vek a nih thu a sawi bawk.
Defence Minister chuan 2017-18 chung khan hel leh sipaite inkahnaah sipai 87 an thi tih a sawi a, J&K-ah bik hian kum nga kal ta chhung khan hel kuta sipai thihna hi 93% zetin a pung tih a sawi.
