India rama Covid-19 hri leng dona kal zelah PM CARES Fund hmangin ram chhung hmun hrang hrangah oxgen plant 850 an siam dawn tih Defence Research & Development Organisation (DRDO) chuan a puang.
DRDO secretary Dr C Satish Reddy chuan district hrang hrangah oxygen plant 850 siam a ni dawn a, heng plant-ah hian minute khatah oxygen litre 1,000 siam chhuak thei zel a ni dawn tih a sawi.
Dr Reddy chuan hri leng thawh hnihna thleng mekah DRDO chuan mipui harsatna chhawk zangkhai nan a theihtawpin a bei a, a hun takah mi tam tak puih an ni thei tih a sawi bawk.
Hri kai an pun zel avangin hri kai enkawlna tur hospital lailawkte pawh an siam tih sawiin, "Hengte hi awlsam taka siam mai theih an nih avangin flying hospital tih hming kan pe a, hriin damdawi-in a chhuahsan loh nana siam kan ni. Hri leng thawh thumna a lo thleng leh a nih chuan damdawi-in zawng zawngten hri kaite an enkawl vek a ngai dawn a, hemi chungchang hi sorkar chuan mawhphurtu hrang hrangte pawh a sawipui mek a ni," tiin Reddy chuan a sawi.
India ramah Thawhlehni khan hri kai 60,471 an awm belh leh a, April 1 hnua Covid-19 hri kai tlem ber ṭum a ni tih Union Health Ministry data chuan a tarlang. Ram pumah hri kai hmuh chhuah tawh hi 2,95,70,881 an awm tawh a ni. Hemi ni vek hian hripui vanga thi mi 2,726 awm belhin, Covid-19 thihpui 3,77,031 an awm tawh.
