Congress party president hlui Rahul Gandhi leh party MP eng emaw zat chu Enforcement Directorate (ED) in money laundering case-ah Sonia Gandhi thu an zawhfiah leh vanga lungawi lohna an lantir avangin Delhi police-ten an hreng.
Rahul Gandhi leh Congress MP ṭhenkhatte hian BJP kaihruai sorkar laipui chu central agency-te dik lo taka hmanga puhin, lungawi lohna lantirin Rashtrapati Bhavan pana kawng zawh tumin Vijay Chowk-ah an kal khawm a ni. Police-te chuan kawng an zawh tum hi dangin, Rahul Gandhi hi police bus-in an hruai hrang nghal a, an hruaina hmun erawh an sawilang lo. Congress MP-te pawh bus dangin an hruai sawn nghal bawk.
Rahul Gandhi chuan, "India hi police state a ni tawh a, Modi chu lalber a ni," a ti. Parliament-ah pawh eptu lamten sawiho tura an duhte chu engmah sawiho phal a ni lo tih a sawi bawk.
"Hmun dangah kal ka tum lo. Kan lungawi lohna hi President-in a lo hriat ve atan, President chenna in lam pana kawng zawh kan tum mai a ni. Mahse police-te chuan min phalsak lo a ni," tiin Gandhi chuan a sawi.
Congress Rajya Sabha MP Jairam Ramesh pawhin Congress MP-te chu kawng zawh tur dan an nih hnuah police-te chuan an hreng lui a, police bus-in an phur sawn a, Prime Minister leh Home Minister-te chauhin an hriatna hmunah hruaiin hren an ni, a ti.
Rajya Sabha-a leader of opposition Mallikarjun Kharge chuan, police-te kaihhruaina an siam angin nawrh huaihawt pawh hi an kalpui tih a sawi a, hetih laia MP-te hren an ni leh chu PM Modi leh Amit Shah-ten eptute tihchhiat vek a, aw chhuah thei loa siam tuma an phiarna a nih thu a sawi. Mahse heng thil hian a tihlau mai dawn lo a, an bei zui zel dawn tih a sawi bawk.
Enforcement Directorate hian National Herald newspaper-in dan kalha sum a hmuh dan thup nia puh chungchangah Sonia Gandhi hi a ṭum hnihna atan nimin khan thu an zawt leh a, darkar hnih chhung vel thu an zawt a ni. A hmain Rahul Gandhi pawh thu zawhfiah a lo ni tawh bawk.
National Herald newspaper hi Young India Pvt Limited ta niin, Associated Journals Limited (AJL) in a tichhuak a ni. Sonia Gandhi leh Rahul Gandhi hi promoter leh shareholder zingah an tel. ED hian National Herald newspaper kaihhnawiha AJL-in pawisa a transfer danah thil dik tawk lo a awm niin a sawi a ni.
