Prime minister Narendra Modi-a'n eptu ṭangrual pawl, INDIA te ṭawngkam na taka bei a, kalphung nei lo tia firfiak pawl Indian Mujahideen leh dan pawna hnawl mek, Popular Front of India hmingte nena sawizawm khumna chu Congress hruaitu Rahul Gandhi chuan a twitter-ah a chhang.

Gandhi chuan, eptu pawlte chuan Manipur damna turin a pui zel dawn a, hmarchhak state-ah hian India nihna dik tak a din thar leh dawn a ni, a ti. "I duh dan danin min ko rawh, Mr. Modi. INDIA kan ni e. Manipur damna turin kan pui zel dawn a, hmeichhiate leh an fate mittui kan hruk hul sak dawn. Inhmangaih tawnna leh boruak muanawm chu a mite tan kan la let dawn. Manipur-a hian India nihna dik tak kan din thar leh dawn a ni," a ti.

PM Modi hian nimina BJP parliamentary meeting-ah eptu pawl, INDIA chu na taka beiin, 'Hetiang ang taka kalphung nei lo eptu ka la hmu ngai lo," a ti. Modi chuan bei chhunzawmin, "INDIA tih hmingin anmahni an infak ringawt a ni. Indian National Congress, East India company, Indian Mujahideen, Popular Front of India - hengte hi INDIA an ni vek. INDIA tih hming put ringawt chu engtihna mah a ni lo," tiin a sawi.

May 3 aṭanga Manipur-a tualchhung buaina nasa tak chhuak chungchangah PM Modi hi vawi khat chiah a la ṭawngchhuak a ni. Hetih lai hian eptu party-te chuan Parliament monsoon session neih mekah Manipur buaina sawiho an phut a, member-te in auhbuai avangin session pawh hi rorel thei loin a la awm. Eptute chuan PM hi Parliament-a in hnih, Rajya Sabha leh Lok Sabha-ah Manipur chungchangah thu sawi turin an phut bawk.

Congress party president Mallikarjun Kharge chuan PM Modi chu, Parliament in hnihah Manipur chungchangah ṭawngchhuak ngei turin a ngen nawn leh bawk. Kharge chuan Manipur dinhmun chu a derthawng hle a ni tiin, he buaina hian state dang pawh a kangkai chho a, state ṭhenawma hetiang thil a thleng chho hi ram pum tan pawh a ṭha dawn lo a ni, a ti. Ni 88 chhung zet buaina chhuak chinfel loha la awm hian PM-in Parliament-ah a sawilan ngei a ngai tih a tilang chiang hle niin a sawi. Modi chuan inlaklennate a dahṭhat rih a, Manipur boruak siamṭha tura a kaihhruai hmalaknate a sawi a, boruak a ṭhat chhoh theih hun turte a sawi a hun tawh, a ti.

Lok Sabha-ah sorkar rin tawklohna motion putluh tum

Eptu ṭangrual pawl, Indian National Developmental Inclusive Alliance (INDIA) chuan Lok Sabha-ah sorkar rin tawk lohna, no-confidence motion putluh a tum nia sawi a ni.

Nimin zing khan INDIA chuan meeting neiin, notice thehluh chungchang hi an sawiho.

Manipur buaina chungchangah eptute chuan prime minister Narendra Modi chu kawng hrang hrangin Parliament-a ṭawngchhuak turin an nawr a, hei bakah hun rei zawk sawihona hun siam an phut bawk. Sorkar lamin eptute thil nawr hi a la dan zel avangin, Manipur chungchang sawiho a nih ngei theihna tura hmalakna atan no-confidence motion put luh hi an rel niin an ngai.

Eptu lam chuan House pahnihah hian Manipur buaina sawiho a nih ngeih theihna turin an nawr chhunzawm zel dawn tih an sawi bawk.

Nimina Parliament in hnih inkhawm pawh rorel thei loin tihtawp a ni leh a ni.