West Bengal-a Trinamool Congress (TMC) Rajya Sabha Member of Parliament (MP), Saket Gokhale chuan Thawhṭanni khan prime minister Narendra Modi lakah complaint a theh lut.

Saket Gokhale hian Election Commission of India (ECI) hnenah PM Modi hi Andhra Pradesh-a Chilakaluripet assembly constituency-a National Democratic Alliance (NDA)-in election rally an buatsaihah, Indian Air Force (IAF) helicopter a hmang nia sawiin, Model Code of Conduct (MCC) bawhchhiaah a puh a ni. Gokhale chuan EC-in Lok Sabha inthlan neih hun tur a puan khan MCC hman ṭan nghal a ni a, MCC bawhchhiate lakah na taka action an lak tur thu an puan anga hma an lak ngei a phut thu sawiin,"MCC danin a tarlan angin, India khawl, bungrua leh hmanruate, inthlan campaign-na atana hman phal a ni lo. Indira Gandhi pawh 1975 khan hetiang avang hian disqualify a ni tawh a ni. BJP hian IAF helicopter hi man chawiin lo hmang pawh ni se, EC hian IAF helicopter hman a ṭulna hi a tarlang tur a ni," a ti.

PM Modi laka complaint a theh luh chu inthlan kaihhnawiha an inrawlh phal a nih loh avangin Supreme Court ni loin, ECI hnena theh lut a nih thu hi Gokhale hian X-ah a sawi zui a ni. 2014-a ECI thuchhuaha Special Protection Group (SPG) venhimna hnuaia awmte tan sorkar lirthei hman phalna pek chungchangah, he thuchhuahin a huam chin chu bulletproof leh convoy chauh a nih thu te, IAF helicopter a tel loh thu a tarlang bawk.