Enforcement Directorate (ED)-in Delhi excise policy thubuai kaihhnawiha an man hnuah Delhi chief minister, Arvind Kejriwal chuan Delhi High Court-ah a khin letna a theh lut.

Kar liam ta Ningani zan khan Kejriwal hi Delhi-a zu zawrh dan phung siam thar kaihhnawiha pawisa chheprelhah puhin man a ni a, a chungchang hi Zirtawpni khan trial court-in a ngaihtuah nghal a ni. Zirtawpnia thubuai ngaihtuahnaah hian ED chuan Kejriwal hi thu zawh fiah chhunzawm tura ni 10 chhung kawl an dil a, hei hi trial court hian ni ruk chhung kawl phalsakin, ED hian March 28 thleng an kawl dawn a ni.

Trial court-in a chungthu a rel hnu hian, Kejriwal leh, a aiawha dan hre mi ding, Singhvi leh a pawlte chuan man a nihna hi Delhi High Court-ah khing let ve lehin, high court hnenah hian nimin khan ngaihtuah nghal turin an thlen. Mahse Delhi high court hi Holi denchhena an chawlh avangin Kejriwal-a'n man a nih a khinna hi March 27 hma chuan ngaihtuah a nih a rinawm loh.

ED hian Arvind Kejriwal hi Delhi excise policy-a sum chheprelh leh dik lo taka thil tih kawngah a bul tumtu niin an puh a, policy zam kawngah amah ngeiin ruahmanna siamin, a thil sual tih aṭanga sum tihchengpen leh chheprelh chu, Rs. vbc. 600 aia a tam an rin thu an sawi a ni. Kejriwal hian ED-in thu zawh fiah tura inlan turin vawi kua an hriattirna zawm loin, high court-ah venhimna a dil a, hei hi high court hian a hnawlsak hnuah ED-te hian Ningani zan khan an man ta a ni.

Tan in aṭangin Kejriwal-a'n thupek a chhuah

Tan ina awm mek Arvind Kejriwal chuan a tanna hmun aṭangin sorkar hmalakna tur thupek a chhuah thu AAP hruaitu, Atishi chuan a sawi.

Man ni mah se, Delhi Chief Minister a nihna a la kenkawh reng tur thu AAP-in an sawi hnuah, Arvind Kejriwal hian state sorkara water department chu Delhi-a tui harsatna sukiang tura tui phur motor tir chhuak turin hriattirna a chhuah a ni. Delhi water minister ni lai, Atishi chuan Kejriwal-a'n thupek a chhuahna hi tarlangin, Delhi-a tui harsatna an tawhna hmunahte tui hnianghnar taka an neih chhunzawm theih nana hma la tura a chah thu a sawi a ni.

"Delhi hmun ṭhenkhatah tui harsatna in tawh thu leh, tui chhe paihna avanga harsatna a thlen thu ka lo hria a, tan ina ka awm avang hian mipuiten harsatna in tawh ka duh lo a ni. Hei vang hian tui phur motor tirh chhuah a nih theih nan leh, tui harsatna sutkian a nih theih nan thuneitute'n an lo bawhzui atan ruahmanna ka siam a ni," tiin tan in aṭanga thupekah chuan tarlan a nih thu Atishi hian a sawi lang bawk.