Kerala-a Wayanad district-a Thawhlehnia leimin nasa thleng vanga Chooralmala leh Mundakkai-te tlawhpawh theih loha a awm hnuah, Indian Army chuan heng khaw pahnih kalpawhna tur hian darkar 31 chhungin brailey bridge, feet 190-a thui an siam zo.
Bailey bridge hi leimin leh lung lumin concrete lei, feet 100-a a thui a hnawl chhiat tak awmnaah bawk siam leh a ni. Lei zau lam hi meter 3 niin, Indian Army in a siam zawh hian ambulance tlantir hmasak ber niin, a hnuah sipai truck-te tlantir leh an ni. Major General VT Mathew chuan lei dawh tharah hian ton 24 china rit tlan ngam a nih thu a sawi. A zau zawng pawh earthmover, excavator, truck, ambulance leh jeep-te tlanna tur pawhin a zau ṭha tawk a ni, a ti.
Feet 190-a thui lei siamna tur panel, feet 10 zela sei hi truck 20 hmangin Thawhlehni vek khan Bengaluru aṭangin phurh luh a ni. Maj Gen Mathew chuan steel panel hi 19 hman a nih thu a sawi a, lei dawh hna hi Nilaini zing dar 9 aṭangin Madras Engineer Group aṭangin officer 144 an thawk nghal tih a sawi. Ngawrh taka hna hi thawh niin darkar 31 hnu, August 1, 2024 zan dar 6-ah an peih fel ta a ni.
Leimin vanga thi mi 300 an chuang tawh
Leimin vanga thi hriat theih chin hi nimin chawhnu lam thleng khan mi 300 an chuang tawh niin Kerala health minister Veena George chuan a sawi.
Ruah sur hnuaia chhanchhuah hna thawktu team 40 chuan leimin thlenna zone parukah chhanchhuah hna hi an thawk chhunzawm mek a ni. Joint team-ah hian army, NDRF, DSG, Coast Guard, Navy leh MEG te an tel a, tualchhung mi leh forest department lamin an pui bawk.
Chief minister Pinarayi Vijayan chuan Mundakkai, Chooralmala leh Attamala khuaa mite chu hmun him lamah sawn chhuah vek an ni tawh tih a sawi a, heng hmuna leiminin a chilh ruang zawn hna chu ngawrh takin thawh mek a ni, a ti. Vawiin hian ruang zawnnaa pui turin Delhi aṭangin drone-based radar a thleng dawn tih state revenue minister K Rajan chuan a sawi.
Gandhi-te unauin Wayanad an tlawh
Lok Sabha-a leader of opposition, Congress party hruaitu Rahul Gandhi leh a farnu, Congress general secretary Priyanka Gandhi-te chuan Ningani khan leimin thlenna hmun, Wayanad-a Chooralmala an tlawh.
Gandhi-te unau hian leimin tuarte pawh kawmin, Rahul Gandhi chuan mipuite tawrhna nasa tak chuan a pa thih ṭuma a rilru na tluk zetin a rilru a ti na tih sawi. Wayanad-a chhiatna thleng chu Kerala leh ram pum tan pawh chhiatna rapthlak tak a ni tiin, harsatna tawktute ṭanpui tur chuan theihtawp an chhuah zel dawn tih a sawi. Heng mite ṭanpui tura inpe hrang hrangte chungah lawmthu a sawi bawk. A farnu nen hian relief camp-te an tlawh bawk a, AICC general secretary leh Alappuzha MP KC Venugopal-a'n a ṭawiawm a ni.
