US vice president JD Vance leh a nupui fanau te chu tun thla chhung hian India-ah an rawn zin dawn thu tih chian a ni tawh, an chhungkua hian 'heritage tour' an rawn nei pah dawn a ni. VP te chhungkua bakah hian ruahman sa angin US National Security(NSA) adviser Mike Waltz pawh a rawn zin dawn bawk.
Vice President Vance leh NSA Mike-te India tlawh hun leh chhan tur erawh in ang loin, Vance-te chhungkua hi chu mimal thil a India tlawh tur an ni a, prime minister Narendra Modi chuan Delhi-ah a lo mikhual dawn a ni. Vance nupui,Usha Vance hi South India mi niin America-a seilian an ni thung. April 21-24 hian rawn zin tura beisei an ni a, hetih lai hian PM Modi hian hun rei tak chhung aṭanga sawn hlat tawh Saudi Arabia a tlawh hun tur atana April 22-24 a lo ruahman tawh nen a in sut buai rin a ni bawk.
NSA Waltz hian India-a a cham chhungin NSA Ajit Doval nen India-U.S. Initiative for Critical and Emerging Technologies (iCET) tih ni ṭhin, Transforming Relations Utilizing Strategic Technologies (TRUST) tia thlak tak chungchangah inbiakna an nei ang. Waltz-a hun hman dan tur ruahmanah hian Indo-U.S. chungchang sawi hona, Delhi-a Ananta Centre-in a buatsaihah thu sawi tura tih a ni bawk. US sorkarin India aṭanga bungrua lak luh zawng zawnga chhiah lak tur 26%-a a tihsan hnua a rawn zinnna hmasa ber tur a ni.
U.S. Director of National Intelligence (DNI) Tulsi Gabbard-i chu India rawn zin tawh bawkin, kumin nipui chhungin defence minister Peter Hegseth pawh rawn zin tura beisei a ni bawk. Kumin kumtawp lama U.S. president Donald Trump-a'n India rawn tlawh a tumna atana inbuatsaihna a nih rin a ni. President Trump hi Quad Summit-ah a rawn tel dawn bakah, India leh US-te inkara Bilateral Trade Agreement thawh khatna rawn tih fel nghal a tum nia sawi a ni.
