Congress party hruaitu, Lok Sabha-a Leader of Opposition Rahul Gandhi chuan India mipuite ṭhatna tur leh, an dikna chanvo te humhalh turin Congress chuan a bei zel dawn tih a sawi.

Party president hlui Gandhi chuan Parliament budget session neih zawh takah han Congress kaihhruai standing committee-te chuan India mipuite dinhmun ṭha zawka siamna tur rawtna hran hrang pawh a siam a ni, tiin a tarlang.

Charanjit Singh Channi kaihhruai Committee on Agriculture chuan legal MSP siam a, loneitu leh sangha mantute venhimna tur bakah zangnadawmna pek belhna tur rawtna an siam a ni, tiin Gandhi hian X-ah a tarlang. Spatagril Ulaka kaihhruaiin Rural Developmentt Committee chau MNREGA huang zauha tih chak te, hnathawhna kawna harsatna siam theite tih bo dante an rawt bawk. Digvijaya Singh kaihhruaiin Committee on Education, Women, Children,Youth and Sports chuan zirtirtu tam zawk lak a, paper leak thleng ṭhin tih bona tura inseamṭhat a, Aganwandi worker-te lawmman pek ṭhin pawh tih san an rawt niin Gandhi chuan a sawi bawk. Hei bakah Shashi Tharoor kaihhruai External Affairs Committee chuan ram danga inhlawhfaa kal, India mite leh sate venhimna pek chungchang a pawimawh thu pawh an thlen tih a tarlang. "Hengte hi party hmalakna hrang hrang zingah tlem kan rawn sawi chhuah a ni. Eptu lamah awm mah ila, democratic institution tinte hmangin India mite dikna chanvo humhalh a, an ṭhatna turin theihtawp kan chhuah zel ang," tiin Gandhi chuan a sawi.

Congress party hian nimin aṭang khan Ahmedabad, Gujarat-ah ni hnih awh tur Congress Working Committee (CWC) meeting leh All India Congress Committee (AICC) session chu party president Mallikarjun Kharge kaihhruaina hnuaiah an nei. He hunah hian party hruaitu hrang hrangte an tel.

Nimina meeting an ṭan hmain Kharge, Sonia Gandhi, Rahul Gandhi leh Congress Working Committee (CWS) member-te chuan Sardar Vallabhhai Memorial tlawhin zahna an hlan.