President Droupadi Murmu, vice-president Jagdeep Dhankhar, prime minister Narendra Modi and Lok Sabha Speaker Om Birla te chuan nimin Thawhṭanni khan Dr BR Ambedkar piancham pualin Paliament House complex-a Ambedkar limah zahna leh chawimawina lantirin pangpar an hlan.
Senior Congres leader Sonia Gandhi, Lok Sabha leh Rajya Sabha Leader of Opposition ve ve Rahul Gandhi leh Mallikarjun Kharge te pawh Ambedkar limah hian zahna chibai bukin an kal a ni. Anni bakah hian union minister leh MP-te bakah Delhi chief minister Rekha Gupta pawh a kal ve bawk.
Zahna chibai an buk zawhah President Murmu chuan mipui pungkhawmte hnenah Ambedkar hna thawh hrang hrang leh ram hmasawnna tur atana a beihna te, India in tun dinhmun a thlen theihna atana Ambedkar hna thawh hrang hrangte a sawi. PM Modi chuan Ambedkar tumruhna leh remhriatna te chuan India ram chu mahni kut kea din theihna tur kawngah nasa taka hma a hruaipui thu a sawi ve bawk.
Hetih lai hian Congress party president Mallikarjun Kharge chuan PM Modi kaihhruai sorkar chuan an hmui chauhin BR Ambedkar zahna hi an lan tir a ni, tiin a sawi thung. A thil lo suangtuah ṭhin kha engmah an ti hlawhtling lo tih sawiin, thu thar lakhawm tute a kawm naah Ambedkar-a vei em em caste chhiarpui neih chu SC, ST, leh OBC private zirna ina kalte tan neih ṭha a tih thu a sawi.
Dr Bimrao Ambedka hi Dalit chhungkua aṭanga seilian niin hmun hrang hrangah lehkha a zir kualnaah India khua leh tui ngei te lak aṭangin deusawh leh hmuhsit a tawk thin. A thil tawnte avang hian India a vantlang nun siamṭhat tumin theih tawp a chhuah zui ta a ni. A dam chhung khan hnam hnuaihnung zawkte dawmkan chu a thupui niin Scheduled Caste thuam chak kawngah hma a la nasa hle a ni.
