US vice president JD Vance chuan nimin Thawhṭanni khan ni li cham turin India a rawn thleng. Vance hi a nupui India mi Usha Chilukuri leh an fate pathumin an rawn zui. JD Vance leh a nupui, Second Lady-te hi Palam thlawhtheihna ṭum hmunah union minister Ashwini Vaishnaw in lo hmuakin prime minister Narendra Modi-a'n inbiakna neih pahin zanriah a kil pui.
Vance cham chhung hian India leh US in trade agreement chungchang a inbiakna an neih kal mek chhunzawmna tur leh,chhiah chungchang bakah harsatna hrang hrang awmte sawina hun an nei nghal a ni. PM Modi kaihhruaia ram hruaitute inbiaknaah hian external affairs minister S Jaishankar, NSA Ajit Doval, foreign secretary Vikram Misri leh Indian ambassador for US Vinay Mohan Kwatra ten an telpui a ni.
Ram pahnih hruaitu inkawmna hian a tum ber chu India leh US in sumdawn tawnna tur, trade pact tih fel te, thawhdunna an lo neihsa te tih hmasawnna te a ni. Vance-a'n India a rawn tlawh vawi khatna hi US President Trump-a'n ram 60 laka chhiah lak tur a tih tawp lailawk hnu lawkah niin, chhiah lak tih tawp lailawk zingah hian India pawh an tel.
Vance leh a chhungte hian nizan khan Jaipur lam pan nghalin Jaipur-a hun an hman zawhah April 23 hian Agra an tlawh leh ang. India-a hmun hlui hrang hrangte an tlawh dawn a,Ningani khian US lam panin an kir leh ang.
Congress party chuan Prime minister Modi chu dan loa India mi awm thawn haw chungchanga harsatna awmte chu US Vice President sawipui tura an nawr bakah, World Trade Organisation hnuaia an inthlunzawmna chhe mek chungchangte sawi pui turin an lo nawr ve bawk a ni.
