Mizo mi lar, kawng hrang hranga hriat hlawh tak takte fuankhawm leh chetla hmuh tur a awm dawn e. Vawiin tlai hian RG Stadium lamah All Star football match khelh a nih dawn a, zaithiam larte an che dawn bawk.

Cyclone Remal-in Mizorama chhiatna rapthlak tak a thlen a, nunna chan eng emaw zat an awm a, in leh lo chan mi tam tak an awm bawk. Chhiat tawkte ṭanpuina atan zanin hian MFA leh Mizo Professional Footballers Association (MPFA) buatsaihin Rajiv Gandhi Stadium-ah charity match khelh a ni dawn a, Mizo footballer ṭha, ISL leh I-League player-te an inhmachhawn ang.

Mizo footballer-te in tum hma, tlai dar 5:00-ah kan mi lar rual pawh chu harsatna tawkte tan rawn thawk chhuakin, All Star Football match an khel hmasa dawn a, inkhel zawhah kal khawmte tan zaithiam leh lamthiamte an che dawn bawk. Mit leh beng a tlai dawn e.

All Star football match-ah hian kan model neih ṭhat, Nunui Rualhleng (Yellow) leh Kimkimi (Blue) team te an innuai dawn a, team pahnihte hian inkhel hmuhnawm tak min entir ngei an tum a, theihtawp an chhuah dawn.

RG Stadium-ah hian inkhel hmuhnawm tak en tur a awm dawn bakah, tunlai Mizo zaithiam lar leh boruak nei lian, Sangtei Khuptong, K Hminga, Youngfella & Mary Dawngi ten kalkhawmte zaiin an awi dawn bawk a, hei ngawt pawh hi kal chhan tlak a ni.

Mizo footballer ṭha leh mi lar rualte, hmun khata an kalkhawm leh an che tla hmuh tur hi a awm zen zen dawn lo a, hmaih phal chi a ni lo. Harsatna tawkte ṭanpuina ni pah fawmin, RG Stadium-a ennawm pui tak awm tur hi en ve ngei ang che.

Ticket man hi Rs 100 chauh a ni a, D&D Enterprise, Bawngkawn; Y2Goal Agencies, Chanmari; MFA Office, City Park; Vangchhen Enterprise, Kulikawn; Samsung Plaza, Sikulpuikawn leh Dengṭhuama Indoor Stadium, Mualpui-ah lei theih a ni.