North American box office-ah low-budget, American Christmas supernatural slasher film 'Terrifier 3' chu a rawn che ṭha ber a, tlangzarh karah USD mtd 18.3 hmu chhuakin No 1 ah a awm.

Cineverse film, 2022 hit 'Terrifier 2' chhunzawmna, 'Terrifier 3' ah hian Art the Clown a rawn kir leh a, Christmas party-ah sual a rawn thawh leh a ni. Budget hi USD mtd 2 chauh niin, a franchise zinga sum la lut tam ber a ni nghal der. Kumin September 19 khan Fantastic Fest, Texas ah premiere a ni a, October 11 khan theatre-ah tih chhuah a ni. Critics lam review pawh a hmu ṭha hle.

Universal Pictures leh Dreamworks animated film, 'The Wild Robot' chuan a kar thumnaah pahnihna hauhin, USD mtd 13.4 a la lut. He film hi Peter Brown lehkhabu behchhana siam niin, North America-ah USD mtd 83.7 a la lut tawh a, khawvel huapa a sum lak luh hi USD mtd 148 a tling tawh bawk.

Tlangzarh hmaa boruak nei lian, beisei pha ta lo 'Joker: Folie a Deux' chu NO 3-ah a awm a, Joaquin Phoenix leh Lady GaGa te channa film hi kar hnihnaah ticket sale 81% zetin a tlahniam hman a, a sum lak luh hi USD mtd 7.1 a ni. 'Beetlejuice Beetlejuice' chuan kar ruknaah USD mtd 7 a la hmu chhuak thei a, No 4-ah awmin North America-a a sum hmuh chuah tawh hi USD mtd 275 a tling tawh a ni. Film thar, 'Piece by Piece' chuan USD 3.8 la lutin panga a ni. He film hi Pharrel Williams documentary-biopic hybrid, Lego form a siam a ni.