Khiangte Construction Ṭhazual Gospel chart tharah, Mizo hmeichhe gospel artist ṭha ber zinga mi, Cindy Lalthanpuii chuan 'Ka nghakhlel' tih chu No 1-ah a rawn lanpui.
'Ka nghakhlel' tih hla hi zaithiam lar ṭhin, Thartea phuah niin amah pawhin a lo sa lar tawh a ni. Rimawi khawvel lamah Thartea thawm a reh hnuah, Cindy hian a hla hi a rawn sa ve leh a, a thiamin a sa nalh leh hle. A phuahtu ngei hian a pui zui bawk a ni. He hla hian nun beidawng leh harsatna hrang hrang tawkte tana beiseina siamtu, vanram nawm leh ropuina a hmuh tir a ni. Music leh recording hi Studio 911 ah tiin, video hi Gabriel Graphics siam a ni thung.
Ṭhazual Award 2024 neih zawh taka Best New Artist lawmman dawngtu, Dinsangi chuan To Coda a thawhpuina, 'Lalpa I fak ang' tih chu chart-ah pahnihnaah a rawn chho bawk. He hla hi Ṭhazual chart-ah hian hun eng emaw chen a lo lanpui tawh a ni. Seraphic Choir 'Ka chhanna neihchhun' tih chu No 3-ah langin, anni pawh hi Ṭhazual Award 2024-ah Best duo/group award dawngtu an ni a, kar liam ta khan Krismas music video thar an lo ti chhuak bawk a ni.
Vesper Vuite 'Ka thlamuanna Krista' chu No 4-ah awmin, One in Christ ' Krista hnehna changtute' tih chuan Top 5 a rawn khar. Ṭhazual Gospel Top 10-ah hian Zorinsanga Sailo leh C. Lalruatsangi te an la lang chhunzawm a, anni bakah lang thar R. Lalrinmawii, Living Faith leh Amosa Vocal Point an awm bawk.
