Sorkar laipui, Manipur sorkar leh United Naga Council (UNC)-te chuan district chungchangah tunkar chhung hian inbiakna neih leh an tum.
UNC lamin an tarlan dan chuan inbiakna neih tur chungchangah hian kar kalta Inrinni atang khan sorkar aiawhte nen an lo inbe pawp tawh tih sawiin, sorkar laipui leh Manipur sorkar chu inbiakna neih hun tur tichiang turin darkar 48 chhung hun an pek thu leh, Manipur sorkar pawh district thar siam chungchangah an dinhmun tichiang vat turin an hrilh tih an tarlang. Pathianni khan an hun pek hi a tawp tawh thu an tarlang tel bawk.
Ministry of Home Affairs (MHA)-in a tarlan dan chuan, inbiakna nei tur hian October 3 thleng khan UNC leh Manipur sorkar lamte hun a pe a, hemi vang hian UNC lam pawhin anmahni thutlukna anga hma lak an tum pawh an ṭhulh leh rih a ni.
UNC president Gaidon Kamei ve thung chuan thil awmdan hi hi ni reilote chhung an thlithlai leh rih dawn tih sawiin, tun ṭuma district chungchanga an inbiakna tur pawh hi an lak thutak takzet thu a sawi.
District chungchangah August 11 khan Senapati-ah inbiakna an lo nei tawh a, hetah hian MHA leh Manipur sorkar lam aiawh pawh an kal a, hemi ṭum hian September thla-ah inbiakna hi kalpui leh ni se tiin thutlukna anlo siam tawh a ni.
August ni 11-a inbiakna an neih ṭum hian Manipur sorkar lam atangin Cabinet minister pathum - Agriculture & Veterinary Minister V. Hangkhanlian, Tribal Affairs & Hills Minister N Kayisii leh Education & Labour and Employment Minister Th. Radheshyam-te an tel. Anni bakah hian Additional Chief Secretary (Home) Dr. J. Suresh Babu leh Commissioner (Works & IPR) K. Radhakumar Singh-te pawh an tel bawk a ni. UNC lam aṭangin member ṭhahnem tak an tel bawk a, he inbiakna hi Satyendra Garg, Ministry of Home Affairs (MHA) Joint Secretary-in a kaihruai thung a ni.
MHA hmalaknain district chungchangah hian vawi eng emaw zat inbiakna neih a lo ni tawh a, mahse tun thlengin inremna siam a la ni lo. UNC-te chuan inbiakna neih tur sawn hlat a ni ṭhin chu pawi an tih thu an sawi a, sorkar chu inremna siam thuai a nih theih nana chak zawka hma la turin an phut bawk. Kum 2016 khan Manipur sorkar chuan district thar eng emaw zat a din a, hei hi UNC-te chuan duh loin nasa takin dodalna an lantir a ni. UNC-te chuan hmasang ata tawh Naga-te chenna district-a hlankai a ni chu an dem takzet tih an sawi a, sorkar chu a thutlukna lo siam tawh sut leh turin an phut bawk.
