Nagaland-a health and family welfare (H&FW) department chuan state chhung Covid-19 kai an pun chhoh chak leh tak em avangin sample tam zawk test tumin ruahmanna a siam.  

Nilaini thleng khan Nagaland-ah hian RT-PCR hmangin sample 60,952 test a ni tawh a, heng zinga sample 59,854 result chu hriat a ni tawh. Hei bakah hian Truenat hmangin sample 33,161 leh Rapid Antigen Test (RAT) hmangin sample 3,772 test a ni tawh bawk. 

H&FW principal director Dr Vizoli Suokhrie chuan state chhunga test tam zawk neih a nih theihna atan health department chuan hma a la mek tih a sawi a, hemi rual hian anni ang state te-ah sample 90,000 test tawh chu test rate a chhe hran lo hle tih a sawi bawk. 

NHM Mission director Kevichusa Medikhru chuan Nagaland-ah hian Covid-19 leng mek chuan community transmission a la thleng chiah lo niin a sawi. Community transmission a la thleng chiah lo nia sawi a nih avangin state sorkar pawhin test runpui, random testing neihna turin ruahmanna a la siam lo. Hemi rual hian hri kai hmuh chhuah thar zingah natna langchhuak, symptom nei erawh an pung chho zel thung. 

IDSP nodal officer Dr Nyanthan Kikon chuan hri kai hmuh chhuah thar zingah kum upa lam aiin ṭhalai lam an tam chho zawk zel tih sawiin, hei hi health department pawhin a buaipui hle tih a sawi. Ṭhalai hri kai, symptom nei si lote chu hri thehdarhtu an ni chho mek niin health official chuan a sawi. 

Covid-19 hlauh vangin mipui zingah mahnia damdawi lo inchawh chawp a, doctor chawh ni lo ei an awm ṭhin nia report an dawn thu H&FW deputy director Dr Kikameren Longkumer chuan a sawi a, hetiang hi ti lo turin mipuite a ngen a, a bikin natna benvawn neite tan phei chuan mahni thua damdawi lo ei ve ngawt chu a ṭha lo tih a sawi. 

Hri leng chungchang thu dik tawk lo thehdarh a awm ṭhin thu leh, mipuite chu dawt thu thehdarh ṭhinte lo awih lo turin health official-ten an chah bawk. 

Nagaland-a Covid-19 kai hmuh chhuah hi mi 8,824 an tling tawh a, an zingah 6,869 chu enkawl dam ni tawhin, mi 34 in an thihpui tawh a ni.