Meghalaya chief minister Conrad K Sangma chuan Covid-19 hri kai enkawltu, damdawi lama thawktute dinhmun hriatthiampui turin MLA-te chu personal protective equipment (PPE) nena inthuam a, Covid-19 ward tlawh vek tura rawtna a siam.
CM Sangma chuan healthcare worker-ten PPE nena inthuam chunga chhun leh zana damlo enkawl hna an thawhnaah an thil paltlangte chu MLA-te hian an hriatthiampui thei dawn a ni, a ti. He rawtna hi Thawhṭannia Legislative member-ten an state chhunga Covid-19 hri leng mek dinhmun thlir letna an neihah a siam a ni.
Assembly speaker Metbah Lyngdoh chuan CM rawtna siam hi ngaihtuah a nih tur thu a sawi.
Lyngdoh chuan MLA tinte hri leng dona kawngah theihtawpa an ṭan ho a pawimawh thu a sawi a, member tinten rawtna hrang hrang an siamte pawh a kaihhhnawih department-te chuan a ṭul angin hma an la zel tih a sawi bawk.
Eptu member-te chuan ambulance an mamawh belh thu an sawi a, hei hi CM Sangma chuan chhangin DoNER ministry kaltlangin ambulance thar 11 an nei thuai dawn tih a sawi a ni.
CM chuan, "Nikuma hri leng thawh khatna thlengah khan dam lo phurhna tur kha kan buaipui ber niin, oxygen support mamawhna kha a sang lo. Tunah erawh chuan ambulance neih thar apiangah oxygen support kan ti tel zel tawh a ni," a ti. An sum leh hun neih dan angin theihtawp an chhuah zel tih sawiin, Sangma chuan tuna an hun tawn mek chu indona hmachhawn ang a ni a, an theihtawpa ṭhain hma an lak zel thu a sawi. Department leh team hrang hrangte pawhin hna an thawk ṭha tawk hle nia a ngaih thu a sawi bawk.
