Union finance ministry chuan Ningani khan hmarchhak state pasarih-te tan Post Devolution Revenue Deficit (PDRD) grant 7th monthly instalment, cheng vaibelchhe 1,603.41 a pe chhuak.

Central grant dawngtu state-te chu - Assam, Manipur, Meghalaya, Mizoram, Nagaland, Sikkim leh Tripura-te an ni. Grant hi Fifteenth Finance Commission rawtna siam anga pek an ni.

Finance Ministry thuchhuah chuan, Post Devolution Revenue Deficit Grants hi Constitution-a Article 275 hnuaiah state-te hnenah hian pek a ni tih a tarlang.

Union Ministry chuan Assam tan Rs vbc 407.50, Manipur tan Rs vbc 192.50, Meghalaya tan Rs vbc 86.08, Mizoram tan Rs vbc 134.58, Nagaland tan Rs vbc 377.50, Sikkim tan Rs vbc 36.67 leh Tripura tan Rs vbc 368.58 a pe chhuak a ni.

October thla atana PDRD grant 7th instalment pek chhuah tak nen hian, kum 2022-23 atana hmarchhak state pasarihte hnenah Revenue Deficit Grants pek chhuah tawh hi Rs vbc 11,223.921 a tling tawh a ni.