Ram chhunga lirthei neitu pawl hrang hrangte'n sorkar laipuiin dan thar a siam duh loa lungawi lohna an lantir mek karah nimin aṭang khan Assam pawhin zawm vein, sumdawng lirthei leh mimal lirthei te chu an tlan chhuak duh lo a, he nawrh an lantirna hi ni 2 awh tura ruahman a ni.

Assam Motor Worker Associations' Joint Platform convener, Ramen Das chuan,"Sorkar hian sual avanga pawikhawihna ni lo, thil thleng palhah pawh motor khalhtute chauh puh leh dem a tum a ni. Kawngpui siam ṭhat aiin lirthei khalhtu rethei tak tak te hrem a tum zawk a ni. He dan thar hi lirthei khalhtute dona leh lirthei neitute beihna a ni a, dan thar hi ṭhiah a nih theih nan January 5, zing dar 5 aṭanga January 7, zing dar 7 thleng motor khalh chhuak loin kan nawr dawn a ni," tiin a sawi. Ramen Das hian January 4 zana sorkar hotute nena an inbiakna chuan kawngro a su thui lo hle niin a sawi bawk. Assam Motor Worker Associations' Joint Platform hian mimal, mahni lirthei neite pawh an nawrh zawm ve tur hian an sawm a, dan tharin sumdawnnna atana lirthei khalhtute chauh ni loa anmahni pawh a huam tel thu an tarlang a ni.

Indian Penal Code (IPC) thlakna tur atana sorkar laipuiin a pawm tak, Bharatiya Nyaya Sanhita (BNS) hnuaiah hian lirthei khalhtu chuan a inthlahdah vang emaw, lirthei a khalh chak lutuk avanga pawikhawihna nasa taka thlen a, police emaw, thuneitute hnena a hriattir loh chuan kum 10 lung in tan leh Rs. nuai 7 thleng chawi tura hrem theih a ni. Hei hi ram chhunga lirthei khalhtu pawl hrang hrangte chuan dodalin, Assam-ah pawh nimin aṭang khan nawrh huaihawt a ni a, sumdawng lirthei kan tih; bus, taxi leh a dangte a tlan loh avangin mi tam takin harsatna an tawk a ni.