Tripura ram leilung fate hamṭhatna atan sorkar laipui, Tripura sorkar leh Indigenous Progressive Regional Alliance (TIPRA) chuan Inrinni khan New Delhi-ah inremna an ziak.
Inremna hian a tum ber chu Tripura ram leilung fate'n harsatna an tawh hrang hrang chinfel a ni dawn a, hemi bakah hian an hmasawnna atana thawhhona turin ruahmanna an siam bawk. An inremna tihlawhtling tur hian Joint Working Group/Committee din a ni dawn a, anni hian a ṭul angin hma an la dawn a ni. An inremna ziah anga chak taka hmasawnna kawng an zawh theih nan inremna an ziah ni aṭangin hming ziah hnantute chuan nawrh an huaihawt thei tawh dawn lo a ni.
Union home minister Amit Shah chuan prime minister Narendra Modi kaihhruaina hnuaiah MHA chuan hmarchhak chu helpawl awm lohna, buaina awm lo leh tharum thawhna thlen lohna hmuna chhuah tumin hma an la tih a sawi. Home Minister chuan Modi hmalakna avangin hel 10,000 chuangin ralthuam dah thlain nunphung pangngai an zawh leh tawh tih a sawi bawk. Amit Shah chuan Tripura ram leilung fate tan inremna an ziah ni chu ni chhinchhiahtlak tak a ni dawn a ti a, inremna ziah a nih theih nana tha thawhtute zawng zawng chungah lawmthu a hrilh bawk.
Amit Shah hian hmarchhaka helna a reh theih nan an sorkar chuan hmalakna tam tak a neih tawh thu leh, inremna 11 lai helpawl hrang hrang nen an ziah tawh thu a sawi. Tripura tan an inremna ziah chuan buaina tam tak a pumpelhtir dawn niin a sawi a, Tripura chief minister Manik Saha pawhin inremna an ziah chu hmasawnna atana thil pawimawh tak a nih thu a sawi ve bawk.
