Assam chief minister Himanta Biswa Sarma-a'n Lok Sabha inthlan result a chhuah hnuah, hmarchhak state pathum - Meghalaya, Nagaland leh Manipur-a Bharatiya Janata party (BJP) kaihhruai National Democratic Alliance (NDA) chet ṭhat loh chhanah sakhaw zuitu ṭhenkhat BJP duh lo an awm vang nia a sawi chuan sawisel a hlawh hle.
Chief Minister thusawi hi Congress MP Gaurav Gogoi chuan na taka chhang letin, Himanta chu an party chak loh pawm thiam lo khawpa mi puitling lo a ni tih a sawi. Gogoi chuan state pathum chief minister-te chu Himanta thusawi chu thu belhchian dawl lo a nih thu mipui hriata sawilang tura a duh thu a sawi a, hmarchhak zahawmna humhim turin Meghalaya, Nagaland leh Manipur chief minister-te chu a sawm a ni. Himanta hian eng sakhuain nge BJP dodal tih chu chiang takin sawilang lo mah se state pathum an chak lohna a sawite hi Kristian tamna a nih avangin, Kristian sakhaw zuitute a sawi chhan niah a ngaih theih.
Jorhat constituency, Assam aṭanga tling thar Gaurav Gogoi chuan tun Lok Sabha inthlan chu semi-final chauh a nih thu sawiin, kum 2026-a final tur atan an inbuatsaih ṭan tih a sawi. Assam state assembly hi kum 2026-ah an inthlang dawn a, tun Lok Sabha inthlana Congress an chet ṭhat avangin Gogoi hian state inthlan atana inbuatsaihna ṭha tak neiha hnehna chan ngei a beisei a ni.
CM Himanta hian Kristiante chungchang chauh ni loin Muslim sakhaw zuitute chungchang pawh a sawi a, Muslim-te chuan Congress an vote vek niin a sawi bawk. Himanta chuan Muslim-te chuan Congress thlawp mah se sorkar laipui aṭanga hamṭhatna lo kal chu an dawng ve vek a ni, tiin sakhuana behchhana vote thlak an la tam tih a sawi.
Assam CM chuan tun inthlan aṭanga thil lang chiang ta chu BJP ni loin Congress zawk chu sakhuana hmanga politics khel ṭhin an nih thu a sawi. Assam huam chhungah Karimganj chauh chu Muslim ten BJP an thlawpna hmun a ni tih a chiang niin a sawi bawk.
