Arunachal Pradesh chief minister, Pema Khandu chuan Nilainia pharh, Arunchal 2024-25 budget chu state sum dinhmun chawikang tura ruahmanna a ni a, entrepreneurship chawikanna leh Arunachal ṭhalaite hmasawn nana ruahman a ni, a ti.

CM Khandu chuan state-in a thil neih hlu ber chu ṭhalaite a nih thu sawiin, hei hi budget thar pawhin a ngai pawimawh tih a sawi. Budget thar chuan thil ngaih pawimawh zual pathum neiin hengte hi- hnathawk thei mihring hrisel, hmasawnna ruhrel ṭha leh sum dinhmun ṭha te a ni tih a tarlang. Khandu hian sorkar kum kal mek chu 'Year of Youth' thupui hmanga kalpui a nih thu a sawi bawk. Hemi pual hian thalaite thuam chakna turin Rs vbc 100 dah a ni. Ṭhalaite tana counselling service 24x7 pekna tur, Chief Minister Youth Helpline siam a ni dawn bawk.

Arunachal Legislative Assembly-ah July 24, Nilaini khan sorkar kum 2024-25 atana an state budget thar chu finance minister leh deputy chief minister ni bawk, Chowna Mein chuan a pharh a ni.

Budget pumpui atana sum ruahman hi Rs vbc 35,840.79 niin kum hmasa aiin 20.85 % in a tam zawk. Sorkar sum indaih lohna hi Rs vbc 993.08 tura chhut a ni.

Budget-ah hian health sector tan Rs vbc 709, rural infrastructure tan Rs vbc 830, agriculture and allied sector-ah Rs vbc 621, power sector-ah Rs vbc 337, transport infrastructure tan Rs vbc 44, social justice and tribal affairs tan Rs vbc 112, indigeneous affairs tan Rs vbc 61, sports sector tan Rs vbc 116, tourism sector tan Rs vbc 150, education sector tan Arun Shri Mission hnuaiah Rs vbc 2,139 dah a ni bawk. Sorkar sikul 30 siam belhin, IIT-a undergraduate course zirlaite fee tumsak a n bawk ang.