Tripura-ah ruah sur a tam vanga Thawhṭanni aṭanga tuilian an tawh chuan mi nuai 17 nunphung a nghawng mek a, chhiatna thleng vanga thi zat hi 20 an tling tawh. Khuarel chhiatna vang hian mi 65,400 chhawmdawlna-in lamah an awm tawh bawk.

Brijesh Pandey, Revenue secretary chuan August 19, Thawhṭanni aṭang khan ni li chhung ruah nasa taka a sur thu sawiin hei vang hian state chhunga lui liante chim chin a san phah a ni, a ti.

District pali - South Tripura, Sepahijala District, West Tripura District leh Gomati district-ahte August 22, Ningani khan ruah tla a tam hle tih sawiin, heng district pali hi tuilian tuar nasa zual an ni, a ti. Pandey hian Dhalai, Khowai, South Tripura, West Tripura, North Tripura leh Unakoti District-a lui chim chin chuan hlauhawm chin a la pel niin a sawi.

Pandey hian khuarel chhiatna thleng vanga thi hi 14 an tling tawh a, chin hriat loha bo mi pahnih an awm mek tih a sawi bawk. Hemi hnu hian South District-ah leimin vangin mi paruk an thih belh leh a, thi zat hi 20 an tling tawh nia tarlan a ni.

Tripura disaster management department in a tarlan danin, tuilian hian thir ban 844 leh transformer 151 a tichhe tawh a, hei bakah 310 km conductor leh sub-station pahnih a tichhe tawh bawk. Thlai chinna hmun hectares 5000 chuang leh buh phunna hmun hectares nuai 1.20 tuilian hian a chim mek a ni.

State chhunga hmun 2032-ah lei a min a, hmun 1789 chu thenfai a ni tawh. Tuilian hian kawngpui hmun 1,900 vel bawr a tichhia a, hmun 579 a mi chu siam ṭhat a ni tawh. Kawng thenfai hna hi Dozers 153 in an thawk mek a, field engineer 200 chuangin hna thawh an thlithlai reng tih department report chuan a tarlang.

Tuilian chungchanga hma lak dan tur leh pawimawh dangte sawiin Ningani tlai lam khan chief minister, chief secretary leh senior officer dangte chuan ṭhutkhawm pawimawh an nei. Thuneitute chu department leh central agency-te nen ṭha taka thawk hoin khuarel chhiatna ngawng a ziaawm nan ṭan an la a ni.

Tuilian vanga tang mekte chhanchhuak turin State Disaster Response Force (SDRF) team 26 leh National Disaster Response Force (NDRF) team pali (mi 120 zel awmna) tirh chhuah an ni. Civil Defense leh Aapda Mitra aṭangin volunteer 2,000 chuangin ṭanpui hna an thawk bawk.

Tripura sorkarin a ngen angin sorkar laipui chuan helicopter pahnih tir chhuakin Gomati leh South Tripura district-a tuilian vanga tang mekte chhanchhuah hna an thawk a ni.