Assam-a Moran leh Motok organisation chuan Scheduled Tribe status pek phutin Dibrugarh leh Tinsukia district-ah nimin zing dar 5 aṭang khan darkar 12 chhung bandh an huaihawt a; sumdawnna hmun, office leh zirna in te khar vek niin mipui nungphung a khaihhlak phah hle.
Assam-a Moran, Chutia, Tai-Ahom, Koch-Rajbongshi leh Tea-Tribe mipuite hian kum tam tak ST status neih hi an lo phut tawh a, BJP hruaitu hlunte leh state minister te hnenah an thil phut tihhlawhtlinsak tur hian vawi tam tak thu an thlen tawh bawk.
Lunglawi lohna lantirtute hian Dibrugarh leh Tinsukia khuaa kawngpui te pawh dangin, national highway a lirthei tlan te pawh tih din an ni.
Bandh huaihawttute hi All Moran Students Union (AMSU) leh All Assam Motok Yuva Chatra Sanmilan (AAMYCS) te an ni.
Bandh huaihawt an tum vang hian Pathianni zan khan district thuneitute chuan bandh huaihawt, kawngpui dan, motor ke hal leh kangmei ti chhuak thei thil khapna thupek an ti chhuak a, mahse nimin khan bandh hi an huaihawt lui ta tho a ni.
Bandh huaihawtutte chuan district pahnihah hian hmun hran hranah lirthei ke an hal a, Makum-Tinsukia bypass a bandh thlawptute hnawhdarh tumin police te chuan silai vawi hnih an kap nghe nghe tih official ten an sawi a, man erawh an nei lo thung.
AMSU leh AAMYCS chuan union tribal affairs minister Jaul Oram-a'n Assam-a hnam parukte tana ST status pek tur chungchangah sorkarin hma lakna mumal a la nei lo nia sawi avangin lungawi lohna hi an lantir a ni.
AMSU president Pulendra Moran chuan sorkarin an thil phut hi a tih hlawhtlin loh chuan nasa zawkin lungawi lohna lantir zel an tum tih a sawi. "BJP sorkar hian vawi tam tak min tih der tawh a ni. A thua an tiam ringawt chu kan ngaithla tawh dawn lo a, a taka an tih hlawhtlin ngei kan duh tawh," a ti.
