Manipur-a BJP kaihhruai sorkar thlawptu, National Peoples Party (NPP) chuan sorkar a thlawpna a hnukdawk.
NPP president, Conrad Sangma chuan Manipur buaina leh hnam inkara inbeihna thleng mekah, chief minister N Biren Singh kaihhruai sorkar chuan remna leh muanna thlen thei loin, buaina chinfelna kawngah a tih tur ti loin a hlawhchham nia a ngaih thu a sawi. BJP national president JP Nadda hnenah lehkha thawnin, Manipur-a BJP kaihhruai sorkar an thlawpna an hnukdawk thu hi a hrilh a ni.
NPP hian MLA pasarih an nei a, BJP hian seat 60 awmna, Manipur assembly-ah hian seat 32 neiin, party malin majority a la nei pha tho a ni. Hei bakah hian MLA panga nei Naga People Front leh MLA paruk nei, Janata Dal United in an thlawp a, independent MLA pathumin an thlawp bawk. Tualchhung buaina a chhuah hnuah nikum August thla khan Kuki People's Alliance (KPA) MLA pahnih chuan Biren Singh sorkar an thlawpna an lo hnukdawk tawh bawk. Heti chung hian sorkar dinhmun erawh a la nghing pha lo a ni.
NIA in case pathum a la
National Investigation Agency (NIA) chuan Manipur-a tualchhung buaina thleng kaihhnawiha case pathum chu chhuizui turin a la.
Ministry of Home Affairs thupekin heng case hi Manipur Police aṭangin central investigative agency kutah hian hlan chhawn a ni.
Union home minister Amit Shah chuan Manipur-a venhimna kalpui dan ennawnna nei turin nimin, November 18 khan Delhi-ah senior official meeting a neihpui. He hunah hian tun hnaia Manipur state chhunga buaina thleng chungchang an sawi ho. Sorkar mi pawimawhte nen chipchiar zawka sawi hona chu vawiin chhun dar 12 hian neih a ni leh dawn bawk.
Security review an neih mek lai hian Imphal West leh East ah curfew puan niin, district pasarihah internet service tihtawp chhunzawm a la ni. Jiribam-a chin hriat loha bo mi paruk ruang hmuh a nih hnua mipui thinrimten lungawi lohna an lantirna avanga buaina a chhuah hnuah khuahkhirhna hi siam a ni. Mipui lungawi lo pungkhawm chuan MLA eng emaw zat chenna in an suasam a ni.
