Meghalaya deputy chief miniter Sniawbhalang Dhar chuan an ṭhenawm state, Assam sorkarin tun hnaia bawngsa ei khapna a siam chu an kalpui dan leh, an state a nghawng tel em tih an thlithlai zui zel dawn tih a sawi.

Sniawbhalang Dhar chuan Meghalaya-a chengte chuan an ei tur chungchangah an duh zawng thlang turin dikna chanvo an nei a ni, a ti.

Assam sorkar hian bawng talh khapna dan a neih tawh chu siamṭhain, tun hnaiah hotel, restaurant leh mipui punkhawmna hmuna bawngsa ei khapna thupek a ti chhuak thar a ni.

Meghalaya Deputy CM chuan he khapna hian state pahnihte inrina border area-a restaurant-te pawh a nghawng tel tih a sawi a, mahse tualchhung hotute chuan heng mite hian buaina an tawh lohna turin a ṭul angin hma an la dawn a ni, a ti. Mipuite tan pawh lo hlauthawnna tur awm loh th a sawi.

BJP MLA Sanbor Shullai pawhin Assam sorkar thutlukna siam thar hi na takin a sawisel ve bawk a, India danpui kalh, mitinte an ei tur duhthlanna kawnga dikna chanvo an neihte palzutna a nih thu a sawi ve bawk. Central lama an party hruaitute leh, Assam chief minister Himanta Biswa Sarma hnenah pawh lungawi lohna thlen a lehkha thawn a tum.