Manipur-a mi thiam rual, scholar leh activist-te chuan kum kalta May 3, 2024 aṭanga state chhunga buaina chhuak zirchianna, "Report on the Manipur Violence: A Historical Contectualization of State-Sponsored Ethnic Cleansing" tih chu Delhi-ah an tlangzarh.
Lehkhabu tlangzarh inkhawm hi evangelist Hoijalhing-a'n ṭawngṭaina in a hlan a, Kuki Inpi, Delhi-a finance secretary N Touthang chuan thu sawiin, thudik lo thehdarh vanga buaina chhuak ṭhinte chuan thudik hailanna tur kawng a tihbahlah ṭhin thu a sawi.
Rev Paothang Haokip (Retd),Good Shepherd Church of India-a Bishop leh Deputy Moderator pawhin ṭawngṭaina hun a nei a, buaina chhuak mek kara chak taka awm turin a chah.
KOHUR Chairman Benjamin Mate chuan an lehkhabu tlangzarh chu state chhunga buaina leh inbeihna tih ziaawm mai bakah tih tawp anih theih nan a ṭangkai thu a sawi a, thudik lo laka invenna leh rorelna dik a awm theihna tur a nih thu te a sawilang bawk.
Parliament (Rajya Sabha) member K Vanlalvena, Mizoram chuan pawhin thu sawiin, Zohnahthlak hnamte inzawmna te a sawilang. Harsatna tawk mek mipuite chu an tawrhna tam tak aṭanga chakna leh huaisenna nei turin a fuih a, hun hrehawm leh khirh tak karah inlungrualna a awm zel theihnan an lehkhabu tlangzarh chu a pawimawh thu a sawi bawk.
Kuki Students Organization, Delhi president Paojakhup Guite chuan lehkhabu siam a ni chu a lawm thu sawiin, he lehkhabu siam a nih theihna atana Benjamin Mate leh a team te hnathawh pawh a fak bawk. Lehkhabuah hian rorelna dik awm theih nana hma lak a nih dante a inziak a ni, a ti.
