Assam chief minister Himanta Biswa Sarma chuan Singapore-a North East India Festival neihnaa perform tura kal, Assamese singer Zubeen Garg tuipuia a tlakhlum hnuah, North East Festival chief organiser Shyamkanu Mahanta leh a inhnamhnawihna pawl reng reng chu Assam-a event an buatsaih khap a ni tih Thawhlehni khan a sawi. Mahanta hi kum 2013 aṭang khan North East India Festival organiser a ni tawh a ni.
Zubeen Garg hi September 19 khan mi dangte nena yatch trip-a an kal chu tuipuia a chen hnuah a ruang hmuh a ni a, autopsy result-ah tuia tlahlum tia sawi a ni. A chetsual tuk hi festival-a a perform hun tur a ni. Assam state pumah Garg hi ni thum chhung sun a ni. State mipui te chuan a thihna hi an tuar na hle a, mi tam takin a thih dan chu chhui chian an phut bawk. Mahanta leh a team-te chuan Garg hian yatch trip a nei dawn tih engmah hriattir an ni lo tih an sawi a, festival-ah hian perform tura an sawm ni loin ama duh thu a kal a nih tih a sawi.
Garg thihna thleng chungchangah hian Mahanta lakah state chhung hmun hrang hranga police station-ah FIR eng emaw zat theh luh a ni. Criminal Investigation Department (CID) hnenah chhui chianna nei turin state sorkarin pawhin a thlen bawk a ni.
Assam sorkar chuan Mahanta hi an state-a event huaihawt a khapsak bakah a inhnamhnawihna event-ah sum lama ṭanpuina, advertisement leh sponsor-te pawh tiamin, state sorkar aṭangin pek a ni dawn lo tih a sawi. Sorkar laipui hnenah pawh sum lama puihbawmna leh sponsorship pe lo turin ngenna siam a ni bawk.
