Israel sorkar chuan Palestinian ram a luahsak, West Bank-a Juda-te in tur sak hna chu a thawk ṭan a, hei hi kum 1990 hnu lama a sak thar lehna hmasa ber a ni.
Prime Minister Benjamin Netanyahu chuan kum 20 chuang hnua hna an thawh ṭan leh thu hi sawiin, bulldozer leh hmanraw dang hmanga hna thawk lai thlalak chu twitter-ah a tilang a ni. PM chuan Judai leh Samari rama Juda chhungkuate awmna tur in sa theia a awm chu lawmawm a tih thu sawiin, West Bank chu Bible-a an hming lan dan angin a sawi a ni.
Israel sorkarin Juda-te chenna tur in a sakna hmun hi Amichai an ti a, he hmunah hian chhungkaw 40 an awm thei dawn a ni. Amona-a dan loa awma puh avanga Juda chhungkua chhuahtirte chu awmtir an ni ang. Amona-a chengte hi kumin February thla khan Israel Supreme Court thupek angin, Palestinian mimal ramah sak a nih avangin chhuahtir an ni. Amichai hi Amona bul hnai maia awm a ni.
Kum 1967-a Israel-in Palestinian ram, West Bank leh East Jerusalem a luahsak aṭang khan Israel sorkar chuan a ram luah chhungah hian Juda-te chenna tur hmun 140-ah siamin, mi 6,00,000 vel an cheng mek a ni.
Palestinian lam chuan Israel sorkar chetdan chu an dem thu an sawi a, Palestinian Authority President Mahmoud Abbas-a thupuangtu chuan Israel-in Juda mite awmna tura lei laih hna a ṭan chu US-in Israel leh Palestinian inkar buaina siamṭha tura a hmalakna palzutna a ni, a ti. US President Donald Trump chuan Palestinian rama Juda-te awmna tura in sak belh zel chu remna leh muanna siam tuma hmalakna tichhe thei nia a ngaih thu alo sawi tawh bawk.
