Myanmar court chuan an ram hruaitu hlui, Aung San Suu Kyi chu Thawhṭanni khan ei ruk thubuaiah thiam loh chantirin kum ruk tang turin a hrem.

Kum 2021, February thlaa sipaiten Myanmar civil sorkar thuneihna an hnehchhuh hnuah Suu Kyi hi sipaite chuan an hreng nghal a, thubuai pawh eng emaw zat an siamsak tawh a ni. Sorkar phiarru, eiruk leh thil danga thubuai an siamsakah Suu Kyi hi kum 11 tang tura hremna pek a lo ni tawh bawk.

Kum 77 mi, Suu Kyi hi health and education chawikanna tura organisation a din, Daw Khin Kyi Foundation-in sum a dawnte chu dik lo taka tichingpenah puhin, in sakna atan leh sorkar ram chu man tlawm zawka a luah theihna atan hmangah puhin thiam loh chantir a ni.

thubuai He thubuai hi media leh mipuiten an tlawhpawh theih loh tura ngaihtuah a ni a, Suu Kyi-i lawyer-te pawh media mite hnenah court thurel chungchang sawichhuak lo tura thupek an ni.Thawhṭanni hian eiruk thubuai pali ngaihtuah niin thiam loh chantir a ni. Mahse Suu Kyi chuan an puhna hi thu dik lo a ni tiin a pha vek a, a lawyer-te pawhin appeal leh an tum bawk.

Myanmar-a politician-ten civil sorkar paihthlak tak aiawhtu atana din, National Unity Goverment-a foreign minister Zin Mar Aung court thutlukna siam chu sipaiten mipuiten an aiawhtu atana an thlan chhuahte hrekbeh an tumna a ni tiin, Suu Kyi chu chhuah zalen turin a phut nghal bawk.