Israel prime minister, Benjamin Netanyahu kaihhruai sorkarin an ram judicial system siam ṭha a, thlak danglamna tur bill chu Thawhṭanni khan Parliament, Knesset chuan a pawm.

Pathianni khan bill chungchang hi Knesset-ah sawiho a lo ni tawh a, member-te pawh nasa taka inhnialin, eptute chuan sorkar bill siam chu thil zahthlak tak a ni tiin house aṭangin an chhuak a ni. Vote laknaah eptute an chhuah avangin, member 120 awmna Knesset-ah billl hi 64-0 vote hmangin pass a ni ta a ni.

Judicial system siam danglamna turah hian, dan hmanga rorelnaah Supreme Court thuneihna tihnep a, Parliament member-te hnena thuneihna sang zawk pek tum a ni. Hei hi duh lohin ram chhungah vawi tam tak nawrh huaihawt a lo ni tawh a, sorkarin dan siamṭhat a tum dan chu Israel democray tan a him lo niin an sawi.

Parliament-ah pass ni mah se, mipuite chuan he dan hi duh loin nawrh chhunzawm zel an la tum. Political watchdog group leh centrist opposition leader, Yair Lapid chuan dan thar siam hi hnawl turin Supreme Court-ah petition a thehlut dawn tih a sawi a ni. Histadrut trade union confederation pawhin dan thar duh lohna lantirin ram pumah nawrh lian tham tak huaihawtah an vau a, military reservist-te chu duty tura in report lo turin an chah bawk.