Israel sipaite chuan Thawhṭanni khan Gaza City-a damdawi in lian ber, Al-Shifa Hospital an la a, Hamas firfiak 20 an that bawk. Hamas an thah zingah hian high ranking commander Faiq Mabhouh pawh a tel a, ani hi Hamas internal security operation directorate-a hotu a ni.

Israel Defence Force (IDF) in a tarlan danin, he damdawi in hi Hamas senior leader-te'n an hmang tih thu an dawn hnuah, special force-te'n operation hi an nei a ni. Hospital compound an luh pawhin, a chhung lam aṭangin Hamas-ho hian an lo kap a, an rawn kap lai video footage pawh an dah chhuak a ni. Shifa hospital-a firfiak 20-te chu dah bo a ni a, rinhlelh dangte pawh thu zawh fiah mek an ni," tiin an tarlang.

Al-Shifa hi Israel-Hamas indona thlen hnua Gaza hmar lama healthcare facility hman theih tlemte zinga mi a ni a, indo hlaua tlanchhia civil mi tam takin tawm himna atan an hmang bawk.

Israel sipaite hian beihpui an thlak hma hian damdawi in chhehvelah lehkha an thlak a, Al-Shifa leh a chhehvela awmte tan a him lo a, indona hmunah an awm a, IDF-in firfiakte hmunhma tichhe turin beihpui a thlak dawn a ni tiin, Gaza Strip chhim lam, Al-Wawasi lama insaseng turin an hriattir a ni.