Europe ram ṭhenkhat - Ireland, Norway leh Spain-ten Palestine ram an pawm tur thu leh, inlaichinna siampui an tum thu an sawi chu US chuan a dodal.
US national security advisor, Jake Sullivan chuan, "President Joe Biden chuan 'two-state solution' a thlawp reng a, hemi rual hian Palestine ram chu ram dangin an lo pawmsak ve ringawt ni lo, Israel leh Palestinian te inbiakna leh inremna hmanga ding tur a ni," a ti. Mahse, Europe ram pathumte thutlukna siam chungchangah tu pawhin an duh angin thutlukna an siam thei a ni tiin, US erawh a dinna ngaiah a ding reng tih a sawi.
Europe ram pathumin Palestine ram pawm an tum chungchangah hian Israel a lungawi lo hle a, prime minister Benjamin Netanyahu chuan, "Heng ramte hian firfiaka chete lawmman an pe an ni," a ti.
Colombia-in Ramallah-ah embassy hawng dawn
Colombia chuan Gaza Strip-a Israel sipaiten Hamas firfiakte laka beihpui an thlak hnuah, Israel nena an inlaichinna chu titawpin May 3 khan Israel-a embassy chu a lo khar tawh a, West Bank-a Ramalla khuaah embassy hawn thar a tum thung.
Colombia Foreign minister Luis Gilberto Murillo chuan President Gustavo Petro chuan Ramallah-a embassy hawng tur hian thupek a tichhuak tawh tih a sawi. Ramallah hi Palestinian Authority president Mahmoud Abbas kaihhruai PA administrative capital a ni. PA hian West Bank hmun ṭhenkhatah ro an rel mek a; Israel-in nuai chimih an tum,Hamas-te hian Gaza Strip-ah ro an rel thung.
Israel-Hamas indona a thlen hnuah Latin America ram zingah Colombia bakah hian Bolivia, Chile leh Honduras-te chuan Israel nena an inzawmna an lo chhu chat tawh bawk.
