Gaza Strip-a indo mek, Israel leh Palestinian firfiak pawl, Hamas te chuan naupangte hnena polio vaccine pek runpui kalpuina turin, ni thum chhung indo chawlh an remti niin World Health Organisation (WHO) chuan a sawi.
WHO-in kum 25 hnuah Gaza-ah hian polio case a awm thu a sawi hnuah, vaccination campaign hi kalpui tum a ni ta a ni. A thawh khatna atan Pathianni aṭangin zone pathumah vaccine pek runpui hi neih tum a ni a, hemi chhung hian naupang nuai 6.4 te chu vaccine pek hman tum a ni.
WHO senior official, Rik Peeperkorn chuan vaccination campaign hi an ram huna zing dar 6 aṭanga tlai dar 3 thleng neih a ni ṭhin dawn tih a sawi a, central Gaza-ah ṭanin ni thum chhung kalpui a ni ang. Hemi hnu hian chhim lamah ni thum chhung pe lehin, Gaza hmar lamah ni thum bawk kalpui a ni leh ang. Peeperkorn chuan zone tinah hian an pek fel hman loh chuan indo chawlh hun hi ni li pawh pawhsei theih a nih thu a sawi.
Vaccine round khatna pek aṭanga kar li hnuah round hnihna hi kalpui leh a ngai dawn tih Peeperkorn chuan a sawi a, "Polio darh zel tur venna atan round tinah hian 90% tal pek theih a ngai ang," a ti.
Hamas official Basem Naim chuan Gaza Strip-a Palestinian naupang nuai 6 chuangte himna turin international organisation chu lo thawhpui an inpeih thu a sawi. Israel military humanitarin unit (COGAT) pawhin vaccination campaign hi Israel sipaite chuan ṭha takin an lo thlawp dawn tih a sawi ve bawk.
